काठमाडौं । उपचाररत कोरोना संक्रमितको आज बिहान पाटन अस्पतालमा मृत्यु भएको छ । मृत्यु हुने नवलपरासी पश्चिमका कांग्रेस उपसभापति सुवासचन्द्र गिरी रहेका छन् । ३७ वर्षीय गिरीलाई पित्तथैलीमा रहेको पत्थरीको उपचारको लागि रुपन्देहीको भैरहवामा रहेको मेडिकल कलेजमा लगिएको थियो ।
त्यहाँ उपचारका गर्ने क्रममा उनलाई कोरोना भाइरस संक्रमण पुष्टि भएको थियो । गिरीको पित्तथैलीमा पत्थरी देखिएपछि अपरेसन गरिएको पाटन अस्पतालका निर्देशक डाक्टर रवि शाक्यले जानकारी दिए । छातीमा समस्या देखिएपछि उनलाई आईसीयूमा राखेर उपचार गरिएको पनि डाक्टर शाक्यले बताए ।
आफूलाई कोरोना पोजिटिभ देखिएकाले सम्पर्कमा आएका सबैजना होम क्वारेन्टिनमा बस्न आग्रह गर्दै अस्पतालबाटै उनले फेसबुकमा स्टाटस लेखेका थिए । कोरोनाको लक्षण देखिएको र श्वासप्रश्वासमा समस्या देखिएपछि उनलाई साउन २८ गते नै बुटवलको भीम अस्पताल रिफर गरिएको थियो ।
निमोनियाको लक्षणसमेत देखिन थालेपछि उनलाई परिवारले साउन ३० गते ललितपुरस्थित पाटन अस्पताल लगेका थिए ।
