नेकपा सचिवालय बैठक जारी, यस्ता छन् एजेण्डा

काठमाडौं । नेपाल कम्युनिष्ट पार्टी (नेकपा) केन्द्रीय सचिवालय बैठक प्रधानमन्त्री निवास बालुवाटारमा जारी छ । पछिल्लो गठन भएको कार्यदललाई सचिवालयले कार्यदेश दिनुपर्ने माग उठेसँगै सचिवालय बैठक बोलाइएको थियो । 

गत साउन ४ पछि पहिलोपटक सचिवालय बैठक बसेको हो । आजको सचिवालय बैठकले कार्यदल गठनलाई अनुमोदन गर्ने बताइएको छ । यस्तै कार्यदललाई कार्यदेश दिने र समयसिमा तोक्ने एजेण्डा रहेको बालुवाटार स्रोतले बताएको छ । 

नेकपाका दुई अध्यक्ष केपी शर्मा ओली र पुष्पकमल दाहाल प्रचण्डको सहमतिमा कार्यदल गठह भएको थियो । कार्यदलको संयोजक विष्णु पौडेल तोकिएका थिए भने सदस्यहरुमा शंकर पोखरेल, जनार्दन शर्मा, पम्फा भुसाल, सुरेन्द्र पाण्डे र भीम रावल रहेका छन् । 

दुई अध्यक्षले कार्यदल बनाएको भन्दै प्रचण्ड समूहमा भने असन्तुष्टि बढेको छ । सो समूहका माधव नेपाल, झलनाथ खनाललगायतका नेताले दुई अध्यक्षले मात्र नभइ सचिवालयले कार्यदल गठन गर्नुपर्ने र कार्यदेश दिन पाउने माग राखेपछि आजको लागि सचिवालय बैठक बोलाइएको थियो । 

 अहिलेसम्म कार्यदलको बैठक दुई पटक बसिसकेको छ । आजको बैठकले कार्यदलको गठनलाई पार्टीगत निर्णयको स्वरुप दिनेछ । यस्तै बैठकले कार्यदलको समयसिमा तोकेसँगै नेकपा विवाद समाधानको मिति पनि तय हुनेछ ।