राष्ट्रियसभाबाट नागरिकता बिधेयक बहुमतले पारित, राष्ट्रपतिले अब के गर्लिन् ?

काठमाडौं । राष्ट्रिय सभाले नागरिकता सम्बन्धी विधेयक पारित गरेको छ । 

शुक्रवार बसेको राष्ट्रियसभाको बैठकले राष्ट्रपतिबाट पुनर्विचारका लागि फिर्ता भई प्रतिनिधिसभाबाट सन्देशसहित प्राप्त नेपाल नागरिकता (पहिलो संशोधन) विधेयक, २०७९ लाई बहुमतले पारित गरेको हो ।

बैठकमा गृहमन्त्री बालकृष्ण खाँणले राष्ट्रपतिबाट पुनर्विचारका लागि फिर्ता भई प्रतिनिधि सभाबाट सन्देशसहित प्राप्त नेपाल नागरिकता (पहिलो संशोधन) विधेयक, २०७९ प्रश्तुत रुपमा पुनः पारित गरियोस् भन्ने प्रस्ताव पेस गरेका थिए । राष्ट्रिय सभा अध्यक्ष गणेशप्रसाद तिमिल्सिनाले सो प्रस्ताव बहुमतले पारित भएको घोषणा गरे । 

नागरिकता बिधेयक राष्ट्रियसभाबाट पनि पारित भइसकेपछि अब सभामुख अग्निप्रसाद सापकोटाले लालमोहरका लागि राष्ट्रपतिकोमा पठाउनेछन् । सभामुखले प्रमाणित गरी पठाएको १५ दिनभित्र राष्ट्रपतिले लालमोहर लगाउनुपर्नेछ । 
उनले यसअघि नागरिकता बिधेयक पुनर्विचारका लागि फिर्ता पठाएकी थिइन् । तर पुनर्बिचारका लागि पठाएको बिधेयक जस्ताको तस्तै प्रतिनिधिसभा र राष्ट्रियसभाबाट पारित भएको छ ।