सांसद खगराज अधिकारीको सरकारलाई प्रश्नः स्वास्थ्य वीमा कार्यक्रम खारेज गर्न लाग्या हो ? 

काठमाडौं । नेकपा (एमाले) का सांसद खगराज अधिकारीले सरकारले स्वास्थ्य बीमा कार्यक्रमलाई जनपक्षीय रुपमा सञ्चालन गर्न माग गरेका छन् । 

बुधवार प्रतिनिधिसभा बैठकमा समय माग गरी बोल्दै सांसद अधिकारीले सरकारले स्वास्थ्य बीमा कार्यक्रमलाई खारेज गर्न लागेको आरोप लगाए ।

सरकारी अस्पतालहरुले स्वास्थ्य बीमा कार्यक्रमलाई लागू गर्न नसकेको र सरकारले पनि भुक्तानी दिन नसकेको भन्दै उनले बीमा कार्यक्रमलाई सरकारले रद्द गर्न लागेको बताए ।  सांसद अधिकारीले स्वास्थ्य बीमा कार्यक्रममार्फत् ज्येष्ठ नागरिक, अपांग नागरिक तथा एच.आई.भी..एड्स संक्रमितहरुले लाभ लिइरहेकाले उनीहरुको स्वास्थ्यमाथि खेलवाड नगर्न अनुरोध गरेका छन् । उनले यसलाई कुनै पनि हालतमा सरकारले जनपक्षीय रुपमा सञ्चालन गर्नुपर्ने बताए । 

सांसद अधिकारीले भने–‘यो कार्यक्रमलाई रद्द गर्न खोजेका हौँ ? ज्येष्ठ नागरिक र अपांगता भएकाहरुको हामीले हुर्मत लिन खोजेका हौँ ? अहिले त पाँच लाख डोज कोभिसिल्ड समेत हराएको छ, स्वास्थ्य मन्त्रालयबाट । यस्तो अवस्थामा अलपत्र पारेर के गर्न खोज्दैछौँ ? एकातिर हामी आयल निगमलाई मूल्य समायोजन गरेर महंगी घटाउनुपर्ने ठाउँमा पन्ध्र÷पन्ध्र दिनमा स्वचालित मूल्यको व्यवस्था गर्ने भनेर सरकार भन्छ । तर अहिले घट्दा चार रुपैयाँ, नौ रुपैयाँ, तेह्र रुपैयाँ घट्दाखेरी सरकारले घटाएको छैन । नेपालीलाई महंगो मारमा त पा¥यो, पा¥यो तर स्वास्थ्य क्षेत्रमा अत्यन्तै खतरनाक अवस्था आउँदैछ र स्वास्थ्य बीमा कार्यक्रम कोल्याप्स हुँदैछ । 

स्वास्थ्य बीमा कार्यक्रमलाई कुनै पनि हालतमा जनपक्षीय रुपमा सञ्चालन गर्न, समाजवाद उन्मुख कार्यक्रम योमात्रै हो । सभामुखमार्फत् सरकारको ध्यानाकर्षण हुनेछ भन्ने कुरा म रुलिङको अपेक्षा गर्न चाहन्छु । स्वास्थ्य बीमा कार्यक्रम कोल्याप्स गर्न पाइँदैन । अपांग भएका जनताको स्वास्थ्यमाथि खेलवाड गर्न पाइँदैन । ज्येष्ठ नागरिकमाथि खेलवाड गर्न पाइँदैन । एच.आई.भी. एड्स संक्रमितहरुमाथि खेलवाड गर्न पाइँदैन । स्वास्थ्य बीमा कार्यक्रममा आवद्ध सबैलाई स्वास्थ्य बीमा कार्यक्रममा समाहित गर्नका निम्ति जोडदार माग संसदीय दलको तर्फबाट गर्न चाहन्छु ।’