मन्त्रिपरिषदको बैठक बस्दै, मंसिर ४ मा चुनाव घोषणा हुने, सचिवहरु फेरबदल हुँदै

काठमाडौं । मन्त्रिपरिषदको आजको बैठक नियमित नै हो । तर आजको बैठकलाई महत्वका साथ हेरिएको छ । प्रधानमन्त्री शेरबहादुर देउवाले आज दिउँसो १ बजे बोलाएको मन्त्रिपरिषदको बैठकले प्रतिनिधिसभा र प्रदेशसभा निर्वाचन घोषणा गर्ने संभावना छ ।  

बुधबार बसेको सत्तारुढ गठबन्धनको  बैठकमा मंसिर ४ मा चुनाव गर्ने सहमति भएको थियो । त्यही सहमति अनुसार आजको मन्त्रिपरिषद बैठकले निर्वाचनको निर्णय गर्दैछ ।

आजको मन्त्रिपरिषद बैठकले केही सचिवहरुको हेरफेर गर्दैछ । संस्कृति, पर्यटन तथा नागरिक उड्डयन मन्त्रालय र उपराष्ट्रपति कार्यालयको सचिव पद रिक्त छ । अर्थमन्त्रालयका सचिव मधुप्रसाद मरासिनी र मन्त्री जनार्दन शर्माबीचको मनमुटावका कारण उनलाई राष्ट्रपति कार्यालयमा सरुवा गरिने भएको छ ।

राष्ट्रपति कार्यालयका कृष्णबहादुर राउतलाई संघीय मामिला तथा सामान्य प्रशासन मन्त्रालय वा उद्योगमा सरुवा गरिने संभावना छ । अर्थमन्त्रालयको सचिवमा उद्योग सचिव अर्जुनप्रसाद पोखरेल, राष्ट्रिय योजना आयोगका केवलप्रसाद भण्डारी र संचार तथा सूचना प्रविधि मन्त्रालयका सचिव बैकुन्ठ अर्यालको नाम चर्चामा छ । पर्यटनमा संघीय मामिला मन्त्रालयका सुरेश अधिकारी सरुवा हुने पक्कापक्की भए पनि उद्योग, संचार, अर्थको लागि भने सचिवहरुको दौडधूप जारी छ । प्रदेशका सचिवहरु बागमतीका मुकुन्द निरौला संचारमा आउने चर्चा छ । लुम्बिनीका डिल्लीराम शर्मा र सुदूरपश्चिमका रामेश्वर दंगाल पनि सरुवाको दौडमा छन् । 

प्रदेश नम्बर १ का प्रमुख सचिव विनोदप्रकाश सिंह त गृहमन्त्रालयमै सरुवा हुने दाउमा लागेका छन् । प्रधानमन्त्री देउवाको भेगकै भएकाले उनी गृहसचिव हुने खेलमा लागेका छन् । गृहसचिवका लागि कृष्णहरि पुस्कर समेत लागेका छन् । उनी सचिव बढुवा हुनासाथ गृहमा पदस्थापन हुन्छु भने पनि राजस्व सचिवमा भएका थिए ।