भोलि औपचारिक रुपमा कांग्रेस बन्दै सुनिल थापा, सह-महामन्त्री पद पक्का

काठमाडौं । राष्ट्रिय प्रजातन्त्र पार्टी (राप्रपा) मा तरंग ल्याउँदै पार्टी छोडेका सुनिलबहादुर थापा भोलि नेपाली कांग्रेस प्रवेश गर्ने भएका छन् । 

गत शनिबार उनीलगायत ३१ नेताले राष्ट्रिय प्रजातन्त्र पार्टी (राप्रपा) बाट संयुक्त राजीनामा दिएका थिए । उनी आफ्नो टिमसहित कांग्रेस प्रवेश गर्ने तय भैसकेको थाहा भएको छ । 

पार्टी प्रवेश गरेपछि थापालाई सह-महामन्त्री पद दिइने भएको कांग्रेस स्रोतले जनाएको छ । उनीसँग आउने पाँच जनालाई केन्द्रीय सदस्य दिने तयारी कांग्रेसको छ ।

कांग्रेसमा जाँदा थापाले आफूलाई महामन्त्री पद मागेका थिए । यस्तै आफूनिकटका अन्य ११ जना नेतालाई केन्द्रीय सदस्य समेत माग गरेका थिए । तर उनीलाई सह-महामन्त्री र पाँच जनालाई केन्द्रीय सदस्य  दिने शर्तमा थापा सहमत भैसकेका छन् ।

पछिल्लो समय नेपाली कांग्रेसले राप्रपा लगायतका दलका प्रभावशाली नेतालाई पार्टीमा भित्र्याउने क्रम जारी छ। धनकुटा क्षेत्रमा राम्रो पकड भएका थापाले पार्टीको नेतृत्वपंक्तिसँग असन्तुष्टि जाहेर गर्दै राजीनामा दिएका छन् । पछिल्लो समय राप्रपा एकीकरणपछि नै असन्तुष्ट रहँदै आएका थापाले कांग्रेसबाट आफ्नो राजनीति अघि बढाउन लागेका हुन् ।