यी हुन् नेकपा समाजवादीले सिफारिस गरेका नयाँ मन्त्रीहरु

काठमाडौं । नेकपा (एकीकृत समाजवादी) ८ महिनामा मन्त्रीहरु फेरबदल गरेको छ । एमालेबाट बिद्रोह गरेका सांसदहरुलाई मन्त्री बनाउने क्रममा नेकपा समाजवादीले ६ महिनापछि अर्को टीम पठाउने भनेको थियो । त्यही अनुसार आज समाजवादीले नयाँ मन्त्रीहरुको टीम पठाएको छ । नयाँ मन्त्रीहरुमा समाजवादीले महिलाको प्रतिनिधित्व गराउन सकेको छैन । 
नयाँ मन्त्रीहरुमा काठमाडौंका जीवनराम श्रेष्ठ, अछामका शेरबहादुर कुँवर, दाङका मेटमणि चौधरी परेका छन् ।

स्वास्थ्य मन्त्रीमा भने यसअघिका सोही मन्त्रालयका राज्यमन्त्री भवानीप्रसाद खापुङलाई मौका दिइएको छ । पटक पटक तेह्रथुमबाट चुनाव जितेका खापुङलाई यसअघि राज्यमन्त्री बनाएकोमा उनी असन्तुष्ट थिए । तर अहिले मन्त्रीमा सिफारीस गरी उनीमाथि न्याय गरिएको छ । दाङकै हिराचन्द्र केसी पनि स्वास्थ्य राज्यमन्त्रीमा सिफारिस भएका छन् । 

आज बसेको नेकपा समाजवादीको सचिवालय बैठकमा पार्टी बाट सरकारमा सहभागी मन्त्री हेरफेर गर्ने निर्णय गरेको हो ।

जीवनराम श्रेष्ठलाई संस्कृति, पर्यटन तथा नागरिक उड्डयन मन्त्रालय, मेटमणि चौधरीलाई सहरी विकास मन्त्रालय, शेरबहादुर कुँवरलाई श्रम तथा रोजगार मन्त्रालयको मन्त्रीका लागि सिफारिस गरेको छ ।

२०७८ असोज २२ गते नेकपा समाजवादीको कोटाबाट नियुक्त भएका स्वास्थ्य तथा जनसंंख्या मन्त्री बिरोध खतिवडा, श्रममन्त्री कृष्णकुमार श्रेष्ठ ‘किसान’, पर्यटन मन्त्री प्रेमबहादुर आले, सहरी विकास मन्त्री रामकुमारी झाँक्रीलाई फिर्ता बोलाइएको छ । कानुन मन्त्री गोविन्द कोइराला भने फिर्ता भएका छैनन् ।