ओली-देउवा भेट, बढ्यो चौतर्फी चासो

काठमाडौं । नेपाल कम्युनिष्ट पार्टी (नेकपा) को आन्तरिक विवाद झन् जटिल बनिरहेको अवस्थामा प्रधानमन्त्री केपी शर्मा ओलीले प्रमुख प्रतिपक्षी दल नेपाली कांग्रेसका सभापति शेरबहादुर देउवासँग भेटेका छन् ।

प्रधानमन्त्री निवास बालुवाटारमा बिहीबार भएको सो भेटमा गम्भीर छलफल भएको बालुवाटार स्रोतले बताएको छ । 

पछिल्लो समय प्रम ओली आफ्नै कार्यशैलीका कारण पार्टीका अर्का अध्यक्ष पुष्पकमल दाहाल प्रचण्ड तथा वरिष्ठ नेता माधवकुमार नेपाल लगायतको घेराबन्दीमा छन् । नेकपाको जारी स्थायी समिति बैठकमा प्रचण्ड-नेपालकै तर्फबाट ओलीलाई प्रधानमन्त्री तथा अध्यक्ष पदबाट राजीनामा दिन भनिइसकेको छ । 

तर आफ्नो पद छोड्न नचाहेका ओलीले उस्तै परे पार्टी नै फोरेरै भएपनि केहीसमय सत्ता टिकाउने रणनीतिमा लागेको विपक्षीहरुले आरोप लगाइरहेका छन् । यसका लागि प्रम ओलीले यसअघि अध्यादेश ल्याएसँगै नेकपा फुट्न लागेको चर्चा चलेको थियो । प्रम ओलीले संसदीय दलका उपनेता सुवास नेम्वाङमार्फत् देउवासँग सत्ता सहकार्यको प्रस्ताव राखेको खबर पनि बाहिरिएको थियो । यसका लागि दुई पक्षबीच भित्री संवाद भैरहेको चर्चासमेत सेलाएको छैन । 

प्रम ओलीले पछिल्लो समय राखेको ‘अर्ली’ महाधिवेशनको प्रस्ताव पनि असफल हुन थालेपछि फेरि देउवासँगै सम्वाद बढेको बुझिएको छ । 

कांग्रेस केन्द्रीय कार्यालयका मुख्य सचिव कृष्णप्रसाद पौडेलले विज्ञप्ति जारी गर्दै ओली-देउवाबीच भेट भएको पुष्टि गरेका छन् । तर भेटमा  लकडाउनपछि उत्पन्न भएको नयाँ परिस्थितिको बारेमा कुरा भएको विज्ञप्तिमा उल्लेख छ ।

तर विश्लेषकहरुले पार्टी भित्रका विवाद समाधान हुन नसकेको अवस्थामा प्रमुख प्रतिपक्षी दलका सभापतिसँग ओलीको भेटलाई अर्थपूर्ण भनेका छन् । यसअघिको भेटको खबर तीन दिनपछि मात्रै बाहिरिएपनि यो पटकको भेट तत्कालै बाहिरिएसँगै चोतर्फी चासो समेत बढेको छ।