वीरगञ्ज । कोरोना संक्रमणका कारण वीरगञ्जमा एकजनाको कोरोना संक्रमितको मृत्यु भएको छ । वीरगञ्ज–६ माईस्थान बस्ने ७० वर्षीय वृद्धको मृत्यु भएको हो ।
योसँगै नेपालमा कोरोनाका कारण मृत्यु हुनेको कुल संख्या ४३ पुगेको छ । यसअघि बुधबार पनि दुईजना मृत्यु भएकामा कोरोना पुष्टि भएको थियो ।
सोमबार एडभान्स अस्पतालमा भर्ना भएका वृद्धमा समस्या थियो । सोमबार नै उनलाई नारायणी अस्पताल अन्तर्गतको गण्डक अस्थायी कोभिड अस्पतालमा भर्ना गरिएको थियो । उनको मंगलबार अपरान्ह मृत्यु भएको थियो।
मृत्युपछि उनको स्वाब संकलन गरिएको थियो । नारायणी अस्पतालको पीसीआर ल्याबमा जाँच गर्दा बुधबार कोरोना पोजेटिभ देखिएको थियो । उनको मृत्यु कोरोना संक्रमणबाट भएको पुष्टि भएको गण्डक अस्थायी कोभिड अस्पतालका कोअर्डिनेटर डाक्टर उदयनारायण सिंहले जानकारी दिए ।
वीरगञ्जको स्थिति एकदमै कठिन बन्दै गएकाले लकडाउनका लागि सिफारिस गरिएको बताइएको छ। वीरगञ्जको एडभान्स अस्पतालमा मात्रै ४ जनामा कोरोना संक्रमण पुष्टि भइसकेको छ ।
