नेवानिका पूर्व कर्मचारी आन्दोलित, करार नवीकरण गर्न माग

काठमाडौं । नेपाल वायुसेवा निगम (नेवानि) का पूर्व कर्मचारी आन्दोलित भएका छन् । कोरोनाको प्रकोप बढेसँगै सरकारले गरेको लकडाउनको कारण निगम चरम घाटामा गएको थियो । नेवानिले १ सय ४५ जनाको अस्थायी कर्मचारीको करार नवीकरण नगर्ने निर्णय गरेको थियो। 

ती कर्मचारीहरुले करार नवीकरणलगायतका माग राख्दै नेवानिको कार्यालय अगाडि धर्ना दिएका छन् । उनीहरुले आफ्नो रोजीरोटीको ग्यारेन्टीका साथै निगममा रहेको आन्तरिक भ्रष्टाचार अन्त्य हुनुपर्ने समेत माग राखेका छन् ।

बुधबार नेवानिको मुल गेटमा धर्ना दिएकाहरुलाई प्रहरीले हटाएको छ । सो क्षेत्रबाट हट्न प्रहरीले गरेको आग्रह नमान्दा धरपकड समेत भएको र सात आन्दोलनकारी पक्राउ परेका छन् ।