कम्युनिष्टले चमत्कारमा होइन सामुहिक नेतुत्वमा विश्वास गर्छ – नेता नेपाल

काठमाडौं । नेपाल कम्युनिष्ट पार्टी (नेकपा) का वरिष्ठ नेता माधवकुमार नेपालले कम्युनिष्टn] सामुहिक नेतृत्वमा विश्वास गर्ने बताएका छन् । उनले कुनै व्यक्ति अलौकिक वा चमत्कारिक नहुने भन्‍ने त्यस्तो प्रकृतिको नेतृत्वमा विश्वास नहुने ठोकुवा गरेका छन् । 

पछिल्लो समय प्रधानमन्त्री केपी शर्मा ओलीले आफूलाई हटाएमा देश ठूलो दुर्घटनामा पर्ने बताउँदै आएका छन् । उनको सोही भनाइलाई लक्षित गर्दै नेता नेपालको यो भनाइ आएको बुझिएको छ । 

‘अर्काको अस्तित्व स्वीकार नगर्ने र म नै सर्वेसर्वा हुँ र म नभए केही पनि चल्दैन भन्ने भावनाले कम्युनिष्ट आन्दोलनलाई हिजो विभाजनबाट थिलोथिलो बनाएको कटु यथार्थ भोग्दै हामी यहाँसम्म आइपुगेका छौं,’ उनले प्रधानमन्त्री केपी शर्मा ओलीलाई लक्षित गर्दै भने,  ‘आजपनि कहीँ कतै त्यस्ता गलत, व्यक्तिवादी र गैरकम्युनिस्ट प्रवृत्तिहरु देखा पर्दछन् भने त्यसका विरुद्ध दृढतपूर्वक उभिनु सबै इमानदार नेता–कार्यकर्ताको कर्तव्य हुन्छ।’  

यस्तै कम्युनिष्ट पार्टीलाई कमिटी प्रणालीका आधारमा चलाउनु पर्ने विचार समेत उनले राखेका छन् । ४२ औं पुष्पलाल स्मृति दि‍वसको अवसरमा विज्ञप्ति जारी गर्दै उनले यस्तो बताएका हुन् ।

कम्युनिष्ट पार्टीलाई अझै बलियो, एकताबद्ध, संस्थागत, विधि–पद्दतिमा आधारित, जनतासँग अझै घनिष्ट, परिवर्तनको मार्गमा दृढ र वैचारिक रुपमा स्पष्ट बनाउन आवश्यक रहेको नेपालले बताएका छन्।