सुरु भएको केहीबेरमै स्थगित भयो नेकपा बैठक

काठमाडौं । लामो समयपछि बस्न सकेको नेपाल कम्युनिष्ट पार्टी (नेकपा) स्थायी समिति बैठक सुरु भएको केहीबेरमै स्थगित भएको छ । यसअघि पटकपटक स्थगित भएको बैठक आज १ बजे सुरु भएको थियो ।

बैठक आज बिहान ११ बजेका लागि तोकिए पनि अन्तिम समयमा २ घण्टा ढिलो बस्ने बताइएको थियो । बैठकमा सुरुदेखि प्रधानमन्त्री केपी शर्मा ओली अनुपस्थित थिए ।  

बैठकमा केहीबेर छलफल भएको थियो । केहीबेरमै स्थगित भएको बैठक अब साउन १३ मा बस्ने भनिएको छ । 

बैठकले प्राकृतिक विपत्तीका कारण देश आक्रान्त भएको र यो समयमा सम्पूर्ण जनप्रतिनिधि, पार्टी कार्यकर्ता एवं युवा विद्यार्थीहरूमा प्राकृतिक विपत्तिका बेला स्वयंसेवी भावनाका साथ उद्दार, राहत र पुनस्थापनाका काममा परिचालित हुन आह्वान गर्ने प्रस्ताव पारित गर्दै स्थगित भएको हो । 

पार्टीभित्रकाे विवादका कारण स्थायी कमिटी बैठक अहिलेससम्म ९ पटक स्थगित भएकाे छ।असार १० गतेदेखि सुरु भएकाे बैठकमा प्रधानमन्त्री केपी शर्मा ओलीको राजीनामा मागिएसँगै विवाद बढ्दै गएको छ । बैठक अब साउन १३ मा बस्ने भएको छ । 

सोही विवादका कारण स्थायी समिति बैठक नियमित हुन सकेको थिएन।आइतबार पार्टीका अध्यक्षद्वय केपी शर्मा ओली र पुष्पकमल दाहाल प्रचण्डबीच बैठक अघि बढाउने सहमति भएको थियो।