मन्त्रिपरिषदको बैठक सम्पन्नः भदौ १ बाट आन्तरिक उडान संचालन, ब्यवसाय संचालन हुने

काठमाडौं । गएको चैत ५ देखि बन्द भएको आन्तरिक उडान भदौ १ गतेदेखि खोल्ने भएको छ । सोमबार बसेको मन्त्रिपरिषद बैठकले आन्तरिक उडान खोल्ने निर्णय गरेको छ । कोरोना भाइरस संक्रमणका कारण सरकारले गएको चैत ५ मा आन्तरिक र बाह्य उडान बन्द गरेको थियो । चैत ११ पछि जेठ ३२ सम्म सरकारले लकडाउन घोषणा गरेको थियो ।

असार १ देखि लकडाउन खुकुलो बनाएको सरकारले भदौ १ देखि स्वास्थ्य मापदण्ड पूरा गरी आन्तरिक उडान सुचारु गर्ने निर्णय गरेको एक मन्त्रीले बताएका छन् । मापदण्ड संस्कृति, पर्यटन तथा नागरिक उड्डयन मन्त्रालयले तय गर्ने छ ।

मन्त्रिपरिषदले लकडाउन थप खुकुलो बनाई रोकिएका अन्य व्यवसाय पनि सञ्चालन गर्न दिने निर्णय पनि गरेको छ । होटल लगायतका ब्यवसाय पनि सरकारले अब संचालन गर्न दिने भएको छ ।