झापा । सीमा सुरक्षामा खटिएका सशस्त्र प्रहरी र भारतीय तस्कर समूहबीच झडप भएको छ । शनिबार राति साढे ११ बजे झापाको गौरीगन्ज गाउँपालिका–५ स्थित सीमा क्षेत्रमा झडप भएको हो ।
मल्हाटोलीनजिकै भारतबाट आएको तस्कर समूहले सशस्त्र प्रहरीमाथि आक्रमण गरेको थियो । स्थिति नियन्त्रणमा लिन सशस्त्र प्रहरीले ४ राउन्ड हवाई फायर गरेको प्रमुख जिल्ला अधिकारी उदयबहादुर रानाले जानकारी दिए ।
झडपका क्रममा सशस्त्रका दुई जवान सामान्य घाइते भएका छन् । चार राउण्ड हवाई फायरपछि तस्कर समूह भागेको उनले बताए ।
यसअघि पनि भारतीय तस्करहरुले सीमामा खटिएका सशस्त्र प्रहरीमाथि आक्रमण गर्नेगरेका छन् । तस्करीमा अवरोध पुर्याएकाले शसस्त्र प्रहरीमाथि ती भारतीयहरुले नियोजित आक्रमण गर्ने गरेका छन् ।
