एमालेले सिक्री चोरीको आरोप लागेका पौडेलको उम्मेदवारी फिर्ता गर्ने, मन्जु गुरुङ पोखराको मेयरको उम्मेदवार !

काठमाडौं । नेकपा (एमाले)बाट पोखरा महानगरपालिकाको प्रमुखमा उम्मेदवारी दिएका दीपक पौडेललाई फिर्ता गर्ने तयारी गरेको छ । पृथ्वी चोकमा रहेको सुन पसलबाट केही बर्षअघि सिक्री चोरी गरेको सीसीटीभी फुटेजको भिडियो नै सार्वजनिक भएपछि एमालेले पौडेलको उम्मेदवारी फिर्ता गरी वर्तमान उपमेयर मन्जु गुरुङलाई मेयरमा उठाउने तयारी गरेको छ ।

सीसीटिभी फुटेजका आधारमा पौडेलले सिक्री चोरेको प्रमाणित भएपछि उनले पछि सिक्री फिर्ता गरेका थिए । शनिबार बसेको एमाले सचिवालय बैठकले पौडेललाई उम्मेदवार बनाएको हो । एमालेको गण्डकी प्रदेश कमिटी सदस्य रहेका पौडेल अवकाश प्राप्त शिक्षक हुन् ।

पोखरा महानरपालिका १९ पुरनचौरका पौडेल एमाले अध्यक्ष केपी शर्मा ओलीसँग निकट मानिन्छन् । ओली पोखरा जाँदा पौडेलकै आतिथ्यतामा बस्ने गरेका छन् । पौडेल कृष्ण थापा र राजीव पहारी जति स्थापित नभए पनि ओलीले मेयरमा उम्मेदवार बनाएका थिए । तर उनको सिक्री चोरीको भिडियो नै सार्वजनिक भएपछि एमाले उनलाई ब्याक गर्ने तहमा पुगेको छ । सिक्री चोरीको आरोप लागेका पौडेललाई मेयरमा उम्मेदवार बनाइएपछि उपमयेर मन्जु गुरुङले उपमेयरको टिकट नै अस्वीकार गरेकी थिइन् ।