नेकपा स्थायी समिति बैठक साउन ४ सम्मका लागि स्थगित

आज बैठक बस्‍नका लागि हिजो दुई अध्यक्षले सहमति गरेकाले अधिकांश स्थायी कमिटी सदस्यहरु तयार रहेका थिए । अन्तिम समयमा बैठक स्थगति भएको सूचना पाएसँगै ती सदस्यहरु बालुवाटार नगएको बुझिएको छ । बिहान ११ बजेसम्म चार घण्टाका लागि मात्रै स्थगित भएको बैठक अहिले दुई दिनको लागि रोकिएको हो ।  

पछिल्लो १५ दिनमा नौ पटक दुई अध्यक्षबीच छलफल भएपनि नेकपाको विवाद मिल्न सकेको छैन । प्रम ओली र प्रचण्ड दुबैपक्षले आफ्नो अडान नछोडेको कारण विवाद मिल्न नसकेको बताइन्छ ।

तर पछिल्लो समय भने प्रम ओलीले प्रचण्डलाई पार्टीमा प्रभावकारी रुपमै कार्यकारी अध्यक्ष बन्न सघाउने विषयमा अनौपचारिक सहमति भएका छन् । तर स्थायी समिति बैठकमा कसरी प्रस्तुत हुने भन्‍ने विषयमा कुरा नमिलेको स्रोतले नेपाल फेसलाई जानकारी दिएको छ।

प्रचण्ड समूह भने स्थायी समिति बैठकबाट केन्द्रीय समिति बैठक आव्हान गर्नका लागि जोड गरिराखेको छ भने प्रम ओली यसको विपक्षमा रहेको बताइन्छ।