विवाद सुल्झ्याउन आज पनि छलफल गर्दै ओली–प्रचण्ड

काठमाडौं । नेपाल कम्युनिष्ट पार्टी (नेकपा) अध्यक्ष तथा प्रधानमन्त्री केपी शर्मा ओली र अध्यक्ष पुष्पकमल दाहाल प्रचण्डबीच आज पनि छलफल हुने भएकाे छ । छलफल आज दिउँसाे ४ बजे सुरु हुने तय भएकाे छ । यसअघि मंगलबार दुई अध्यक्षबीच साढे २ घण्टा कुराकानी भएकाे थियाे ।

यही छलफलका लागि भन्दै बुधवार ११ बजेका लागि तय भएको स्थायी कमिटी बैठक स्थगित भइसकेकाे छ । बैठक दुई दिनकाे लागि स्थगित गरिएकाे हाे । 

पछिल्लाे तीन दिनदेखि ओली र प्रचण्डबीच एक्लाएक्लै छलफल भइरहेकाे छ । दुबै पक्षकाे अडानका कारण छलफलले निष्कर्ष निकाल्न नसकेकाे बुझिएकाे छ । तर मंगलबारबाट भने दुबै पक्षकाे लचकताका कारण भने वार्ताले प्रगति गरेकाे बालुवाटार स्राेतले जनाएकाे छ । 

स्थायी समिति बैठकमा प्रधानमन्त्री र पार्टी अध्यक्ष पद छाेड्न माग गरिएपनि प्रचण्ड-नेपाल पक्ष भने तत्कालकाे लागि ओलीले पार्टीकाे जिम्मेवारी त्याग्‍नुपर्नेमा केन्द्रित भएकाे खुमलटार स्राेतकाे दावी छ । 

पार्टी नै विभाजन आउने स्थिती भएपछि नेकपाका दाेस्राे तहका नेताहरु सक्रिए भइ दुई अध्यक्षलाई वार्ता बस्न र लचकता अपनाउन आग्रह गरेका थिए ।  स्थायी कमिटी बैठकले पार्टी एकतालाई जोगाउने जिम्मेवारी ओली र प्रचण्डलाई दिएका छन्।

पछिल्ला छलफल सकारात्मक भएकाले नेकपाकाे विवादलाई यतिखेर समाधान उन्मुख रहेकाे विश्लेषण भइरहेकाे छ । स्थायी कमिटीको बैठक २६ गतेका लागि बोलाइएको छ।