प्रचण्डलाई नारायणकाजीको जवाफ – मेराे मन नहुँदा नहुँदै पनि तपाईंले मलाई पार्टीबाट अलग्याउन खोज्नु भयाे

काठमाडौं । अमेरिकी सहयोगसम्बन्धी सम्झौता एमसीसी सम्झौता अनुमाेदन पछि असन्तुष्ट रहदै आएका नेकपा माओवादीका नेता नारायणकाजी श्रेष्ठलाई अध्यक्ष पुष्पकमल दाहाल प्रचण्डले पार्टीबाट अलग नहुन आग्रह गरेका छन् ।

एमसीसी संसदबाट अनुमोदन भइसकेपछि आयोजित पत्रकार सम्मेलनमा प्रचण्डले नारायणकाजीलाई लक्षित गर्दै पार्टीबाट अलग हुनसक्ने अभिव्यक्ति दिएपछि दुई नेताबीच दुरी बढेको छ ।

स्रोतकका अनुसार आज बिहान प्रचण्ड र श्रेष्ठबीच भएकाे छलफलमा प्रचण्डले पार्टीबाट अलग नहुन आग्रह गरेका थिए । तर श्रेष्ठले “मलाई अलग हुने मन नहुँदा नहुँदै पनि तपाईंले नै अलग्याउन खोज्नु भएको छ” भनेका थिए  ।

यसबीचमा नारायणकाजी श्रेष्ठले आफू पक्षका केन्द्रीय सदस्यहरूको छुट्टै बैठक राखेर पार्टीको पछिल्लो अवस्थाबारे छलफल समेत गरेको श्रेष्ठ निकट एक नेताले बताए ।