जनयुद्ध दिवस मनाउन मधेस प्रदेश जाँदै प्रचण्ड, सरकारले दियो सार्वजनिक बिदा

काठमाडौं । नेपाल कम्युनिष्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ आज मधेस प्रदेश जाने भएका छन् । मधेस प्रदेशले आयोजना  गर्न लागेको जनयुद्ध दिवसको अवसरमा  प्रचण्ड आज मधेस प्रदेश जाने भएका हुन् । 

जनयुद्ध दिवसको अवसर पारेर मधेस प्रदेशले आज सार्वजनिक विदा समेत दिइसकेको छ। ‘०७८ फागुन १ गते आइतबारका दिन २७ औं जनयुद्ध दिवसको अवसरमा मधेस प्रदेशभर बिदा दिइएको सम्बन्धित सबैमा सूचित गरिन्छ’, सूचनामा भनिएको छ ।  

तत्कालीन माओवादीले २०५२ फागुन १ गतेदेखि १० वर्ष लामो सशस्त्र जनयुद्ध गरेको थियो । ०६२–६३ को जनआन्दोलपछि माओवादी जनयुद्ध पनि समाप्त भएको थियो ।

मधेस जानुअघि  प्रचण्डले  २७औँ जनयुद्ध दिवसका अवसरमा शुभकामना दिँदै विभिन्न समूहमा छरिएर रहेका माओवादी घटकहरूलाई एकताबद्ध हुन आग्रह समेत गरेका छन् । देशको अगाडि आइपरेको समस्यालाई आत्मसात गर्दै एकताबद्ध हुन ती घटकलाई आह्वान गरेको प्रचण्डको भनाइ छ। 

माओवादी केन्द्रले पछिल्लो समय मधेस प्रदेशमा संगठन विस्तारलाई विशेष ध्यान दिएको छ ।