ओलीकाे आराेप- संसदलाई भेन्टिलेटरमा पुर्‍याउने काम भयो

काठमाडाैं । प्रमुख प्रतिपक्षी नेकपा एमालेका अध्यक्ष केपी शर्मा ओलीले संसदलाई भेन्टिलेटरमा राखिएको आराेप लगाएका छन् ।

शुक्रबार स्थानीय तह निर्वाचन तयारी केन्द्रित प्रशिक्षण तथा अभिमुखीकरण तालिम’ कार्यक्रमको उद्घाटन गर्दै उनले सरकारले राष्ट्रिय हितमा काम गर्न नसकेको बताउँदै यस्ताे आराेप लगाएका हुन् । 

‘सभामुख हाम्रो पार्टी फुटाउने अभियानमा लाग्छन्। हाम्राविरूद्ध मुद्धा लड्न अदालत पुग्छन्। यस्तो अवस्थामा संसद निरर्थक भइरहेको छ । निर्वाचन हुन नदिने, संसद चल्न नदिने काम भएको छ,’ उनले भने,’निष्प्रभावी बनाएर संसदलाई भेन्टिलेटरमा राखिएको छ। ज्युँदै छैन भनम् भने संसद छ तर ताजा जनादेश लिने भन्दा प्रतिगमन भन्छन्।’

ओलीले  सरकारले अन्तर्राष्ट्रिय सम्बन्ध बिगारेको तर्क गर्दै राजनीतिक अवस्थाप्रति सरकार गैरजिम्मेवार बनेको समेत बताए ।

‘शक्ति राष्ट्रहरूको खेल मैदान बनाउन खोजिएको छ । हाम्रो भूमि फिर्ता ल्याउने कुनै प्रयास भएको छैन,’ ओलीले भने,’राष्ट्रको भौगोलिक अखण्डतामाथि खेलबाड गर्ने आपराधिक क्रियाकलाप भइरहेको छ।’