एमसीसीबारे ७ सवाल उठाउँदै माधव नेपालले भने- आँखा चिम्लेर समर्थन गर्न सकिंदैन

वीरगञ्ज । प्रधानमन्त्री एमसीसी पारित गराउन दौडधुपमा लागेको बेला नेकपा एकीकृत समाजवादी पार्टीका अध्यक्ष माधव कुमार नेपालले भने यथास्थितिमा समर्थन गर्न नसकिने बताएका छन् ।

वीरगञ्जमा समाजवादी प्रेस संगठन पर्साले आयोजना गरेको पत्रकार सम्मेलनमा बोल्दै नेपालले आँखा चिम्लेर समर्थन गर्न नसकिने अभिव्यक्ति दिएका हुन् ।

‘एमसीसीको बारेमा नेपाली जनता र राजनीतिक दल विभाजित छन् । त्यसैले एमसीसीमा क्लयरिफिकेसन चाहिन्छ, कतिपय कुरा मिलाउनुपर्ने छ । तर जनमत एमसीसीको विरुद्धमा छ । जनमतलाई पनि कसरी आश्वस्त बनाउन सकिन्छ । यो पनि एउटा ठूलो चुनौति छ,’ उनले भने ।

एमसीसीको गुण, दोष र तथ्यको आधारमा निष्कर्षमा पुग्न चाहेको बताउँदै उनले एमसीसीबारे ७ कुरामा स्पष्ट हुनुपर्ने बताए ।

उनले उठाएका सवाल यस्ता छन्–

1.  यो इन्डोप्यासेफिक रणनीतिको अंग हो कि होइन ?
2. यो अमेरिकाको सुरक्षा रणनीति अन्तर्गत पर्छ कि पर्दैन ? सैन्य संलग्नता छ कि छैन ?
3.  ट्रान्समिसन लाइन तलको भूभाग वा सडक बनाउँदा नेपालको सार्वभौम अधिकार रहन्छ कि रहँदैन ।
4.  निर्माणको काममा चाहिने श्रमशक्तिमा योग्यता क्षमता अनुसार नेपाली प्रयोग गर्न पाइन्छ कि पाइँदैन ?
5.  त्यसबाट उत्पन्न हुने बौद्धिक सम्पत्तिमा नेपालको अधिकार सुनिश्चित हुन्छ कि हुँदैन ?
6.  त्यसको अडिटिङ गर्ने हक नेपालको अडिटर जनरलले प्राप्त गर्छ कि गर्दैन ?
7.  एमसीसीसँग जोडिएको कानुनको बारेमा स्पष्ट धारणा आउनुपर्छ । आफूखुशी नयाँ–नयाँ कानुन बनाउँदै जाँदा नेपालको हितमा असर गर्छ भने त्यस्तो कुरालाई स्वीकार गर्न सक्छ कि सक्दैन ?

यी प्रश्नहरुको समूचित जवाफ माग्दै नेपालले भने सम्झौता पारितकाे मिति पर सारेर  गहिरोसँग अध्ययन गर्नु पर्छ ।