पार्टी फुट र एकताको मझधारमा छः अध्यक्ष प्रचण्ड

काठमाडौं । दुई तिहाई बहुमतको नजिक शक्ति हासिल गरेको नेपाल कम्युनिस्ट पार्टी (नेकपा) फुटको संघारमा पुगेको छ । स्वयं दोस्रो बरियताका अध्यक्ष पुष्पकमल दाहाल ‘प्रचण्ड’ ले पार्टी फुट र ऐतिहासिक एकताको मझधारमा रहेको बताएका छन् । अध्यक्ष प्रचण्डको भनाइ उद्धृत गर्दै नेकपाका एक नेताले भने–पार्टी एकता गम्भीर संकटमा परेको छ । यो स्थायी समितिले एकता पनि घोषणा गर्न सक्छ । पार्टी फुटको प्लेटफर्म पनि हुन सक्छ ।’ प्रचण्डले पार्टी एकतालाई जोगाइराख्न सक्दो प्रयास गर्ने तर अब जे पनि निर्णय हुनसक्छ त्यसका लागि तयार भएर बस्न पनि नेताहरुलाई आश्वस्त पारेका छन् ।

प्रचण्डले अध्यक्ष एवं प्रधानमन्त्री केपी शर्मा ओली र राष्ट्रपति विद्यादेवी भण्डारीलाई छुट्टाछुट्टै भेटेर फर्किएपछि स्थायी समितिका सदस्यहरुका बीचमा सम्बोधनका क्रममा यी भनाइ सार्वजनिक गरेका हुन् । पार्टीको जीवनमा यो बैठक ऐतिहासिक हुने उनले बताएका छन् ।

बिहीबार बिहान मन्त्रिपरिषद बैठक राखेर संसद अधिवेशन अन्त्य नगर्न गरेको आग्रह प्रधानमन्त्री ओलीले अटेर गरेपछि प्रचण्ड राष्ट्रपति विद्यादेवी भाण्डारीलाई भेट्न पुगेका थिए । भण्डारीलाई उनले संसद अधिवेशन अन्त्य गर्ने सिफारिस हतार हतार सदर गरेझैं अध्यादेश जारी नगर्न आग्रह गरेको बताएका छन् । उनले राष्ट्रपतिलाई पक्षधरता नलिन आग्रह गरेको जानकारी स्थायी समिति सदस्यहरुलाई दिएका छन् ।