हिमपातले समस्यामा परेकालाई राहत उपलब्ध गराउन गृहमन्त्रीको निर्देशन

काठमाडौँ। गृहमन्त्री बालकृष्ण खाँणले तराईमा हावाहुरी र  हिमाली जिल्लामा हिमपातका कारण समस्यामा परेकालाई राहत उपलब्ध गराउन सम्बन्धित निकायलाई निर्देशन दिएका छन्। तराईमा हावाहुरीका कारण मृत्यु भएका तीन जना र पहाडी र हिमाली जिल्लामा हिमपातका कारण समस्यामा परेकालाई तत्काल व्यवस्थापन गर्न निर्देशन दिएका छन् ।

शनिबार बिहान गृहमन्त्री खाँणले मन्त्रालयका विपद् तथा द्वन्द्व व्यवस्थापन महाशाखाका प्रमुख सहसचिव प्रदीपकुमार कोइराला तथा तराईका दुई जिल्ला र हिमाली जिल्लाका आठ प्रमुख जिल्ला अधिकारी र एक सहायक प्रमुख जिल्ला अधिकारीलाई हिमपात र हावाहुरीका कारण अफ्ट्यारोमा परेकालाई तत्काल राहत उपलब्ध गराउन निर्देशन दिएका हुन्।

 हिजो (शुक्रबार) दिउँसो धनुषाको सवैला नगरपालिका १२ मा अवस्थित फकिरचन उच्चमाध्यामिक विद्यालयको प्राङ्गणमा भिक्स मसालाको हाँगा भाचिँदा महेन्द्र सदाकी ८ वर्षकी छोरी प्रतिमाकुमारी र चन्द्रशेखर सदाका ७ वर्षीय छोरा अरविन्दको मृत्यु भएको सहायक प्रमुख जिल्ला अधिकारी प्रदर्शनी कुमारीले जानकारी दिइन्।

गृहमन्त्री खाँणले बिहान सहायक प्रमुख जिल्ला अधिकारी कुमारी र नेपाल प्रहरीका जिल्ला प्रमुख बसन्त रजौरेलाई बच्चाहरूको अन्त्यष्टी र अन्य आवश्यक राहतको व्यवस्था गर्न निर्देशन दिएका थिए।

त्यस्तै शुक्रबारै रौतहटको बुधिमाई नगरपालिका एकमा कच्ची खपडाको घर ढलेर भित्ताले च्याप्दा राममंगल रायकी श्रीमति ४५ फुलमतियादेवी मृत्यु भएको थियो। त्यही घरमा रहेका दुई बार्खा पनि च्यापिएर मरेका थिए। गृहमन्त्री खाणले रौतहटका प्रमुख जिल्ला अधिकारी कृष्णबहादुर शाही र प्रहरी प्रमुख एसपी विनोद घिमिरेलाई आवश्यक राहतको व्यवस्था गर्न निर्देशन दिए।