ठगीमा मुद्दा चल्ने भएपछि सुनिल शर्मा अमेरिका फरार !

काठमाडौं । मेडिकल अध्ययन गर्ने विद्यार्थीसँग तोकिएकोभन्दा बढी शुल्क असुली गर्ने केएमसी तथा नोबेल मेडिकल कलेजका संचालक सुनिल शर्माबिरुद्ध ठगी मुद्दा चल्ने भएपछि अमेरिका पलायन भएका छन् ।  शर्माले नोबेल र केएमसी कलेजमा अध्ययन गर्ने एमबीबीए, बीडीएस/बीएनसका बिद्यार्थीहरुबाट चिकित्सा शिक्षा आयोगले तोेकेको मापदण्डबिपरीत अतिरिक्त शुल्कबापत ५ लाख रुपैयाँ बढी लिंदैआएको छ भने ऐच्छिक हुनुपर्ने छात्रबास(होस्टल) चर्को शुल्क लिएर भर्ना हुन दबाब दिएपछि गएको मंसिर १९ देखि बिद्यार्थीहरु आन्दोलित छन् ।

मेडिकल कलेजको ठगीका बिरुद्ध सत्तारुढ कांग्रेस निकट विद्यार्थी संगठन नेविसंघदेखि नेकपा समाजवादी निकट अनेरास्ववियु, नेकपा माओवादी निकट अखिल क्रान्तिकारी समेत मैदानमा उत्रिएपछि सुनिल शर्मा अमेरिका भाग्न बाध्य भएका छन् ।

आन्दोलन भाँड्न गुण्डा परिचालन गर्नेदेखि सत्तापक्षका नेताहरुलाई घुसको बिटो नै प्रस्ताव गर्दा पनि पार नलागेको र मोरङ प्रहरीले उनीबिरुद्ध ठगीमा मुद्दा दायर गर्ने भएपछि शर्मा अमेरिका पलायन भएका छन् । प्रदेश १ का मुख्यमन्त्री राजेन्द्र राईले समेत नोबेल मेडिकलको ठगीका बारेमा चासो देखाएका छन् ।

शर्माले दुवै कलेजबाट मनपरी शुल्क असुली गरेको बिषयमा यसअघि पनि बिरोध हुँदैआएको थियो । तर राजनीतिक दल र बिद्यार्थी संगठनका नेतालाई घुुस दिएर उनले बिरोधलाई निस्तेज पार्दै विद्यार्थीसँग चर्को शुल्क लिने कार्य जारी राखेका थिए । तर यो पटक नेकपा (एकीकृत समाजवादी) निकट अनेरास्ववियुको अगुवाईमा मेडिकल कलेजका नाममा विद्यार्थीसँग राज्यले तोकेको भन्दा बढी शुल्क लिएर ठगी गर्ने शर्माका बिरुद्ध सम्झौताहीन संघर्ष भइरहेको छ ।

अनेरास्ववियुका अध्यक्ष सुदेश पराजुलीले काठमाडौंमा र सहअध्यक्ष वोसिम आलमले बिराटनगरमा विद्यार्थी ठग्ने नोबेल बिरुद्ध आन्दोलनको मोर्चा सम्हालेका छन् । मेडिकल कलेजका नाममा विद्यार्थी ठगी गर्ने शर्मालाई अनेरास्ववियुका उपमहासचिव महेश श्रेष्ठ र स्थायी कमिटी सदस्य अमर पुनसहित ५ जनाले कालोमोसो  नै दलेका थिए ।

सुनिल शर्माले बिगतमा एउटा शक्तिका बिरुद्ध अर्को शक्तिलाई आर्थिक प्रलोभनमा पारी विद्यार्थीसँग चिकित्सा शिक्षा आयोगले तोकेको भन्दा बढी शुल्क लिई करोडौंकरोड ठगी गरेका थिए । तर अहिले उनका पक्षमा सबै शक्ति एकजुट भएर विद्यार्थीका पक्षमा आएपछि उनको दाउपेच फेल भएको छ । नेविसंघका अध्यक्ष राजीव ढुंगाना नै शर्माले मेडिकल कलेजका नाममा गरेको ठगीका बिरुद्ध मैदानमा बिरोध गर्न आइपुगेका छन् ।  जसका कारण उनी देश नै छाडेर अमेरिका पलायन हुन बाध्य भएका छन् ।

 एमालेको युवासंघबाट निकालिएका विवादित ब्यक्ति पर्शुराम बस्नेतले सुनिल शर्माको ठगीको पक्षमा सामाजिक संजालमा लेखेपछि उनको ब्यापक बिरोध भएको थियो । शर्माको दलाल भनेर बिरोध भएपछि उनले लेखेको स्टाटस नै डिलिट गर्न बाध्य भएका थिए ।