परराष्ट्रको अनुमति नै नलिई मन्त्री यादव सुटुक्क भारत गइन्

काठमार्डौं । भौतिक पूर्वाधार तथा यातायात मन्त्री रेणकुमारी यादव अनुमति नै नलिई भारत गएकी छन् । मन्त्रीले विदेश जानका लागि प्रधानमन्त्री कार्यालयमार्फत् परराष्ट्र मन्त्रालयबाट अनुमति लिनुपर्छ । मन्त्रिपरिषदले भ्रमण स्वीकृत गरी परराष्ट्र मन्त्रालयले अनुमति दिएपछि मात्र मन्त्री विदेश जान पाउने कानुनी ब्यवस्था छ । तर भौतिक पूर्वाधार मन्त्री यादव भने प्रधानमन्त्री तथा मन्त्रिपरिषद कार्यालयलाई समेत जानकारी नदिई भारत गएकी छन् ।

मन्त्रालयका कर्मचारीले विदेश भ्रमणमा जान स्वीकृति चाहिन्छ भन्दा पनि उनी अटेर गर्दै गएकी छन् । माइत जान पनि अनुमति लिनुपर्छ भन्दै उनी जंगिंदै भारत गएको मन्त्रालय सम्बद्ध अधिकारीले बताए ।

एउटा बिहेमा सहभागी हुने भन्दै उनी सुटुक्क भारततर्फ गएकी हुन् । नेपालसँग सीमा जोडिएको बिहारको मोतिहारी जिल्लामा उनको माइती परिवार छ । माइती परिवारकै एक सदस्यको बिहेमा सहभागी हुन भनेर उनी विराटनगर हुँदै जोगवनी नाकाबाट मोतिहारी गएकी छन् ।

मन्त्री यादव मंसिर १८ गते विराटनगरमा जनता समाजवादी पार्टीको कार्यक्रममा भाग लिन गएकी थइन् । त्यहाँबाट उतै उनी भारततर्फ गइन् । उनी गाडीबाटै भारततर्फ गएकी थिइन् ।