ओलीलाई संसदीय दलबाट हटाउने चलखेल, नेपाल समूहलाई सरकारमा जान दबाब

काठमाडौं । नेकपा एमाले पार्टीमा आन्तरिक विवाद समाधान गरेर अघि बढने गरी छलफल भइरहँदा माधवकुमार नेपाल समूहलाई देउवा सरकारमा सहभागी हुन दबाब परेको छ । 

बुधबार बिहान बसेको गठबन्धन बैठकमा नेपाल समूहको प्रतिनिधित्व गरेर सहभागी भएका डा. विजय पौडेलले तत्काल आफूहरु सरकारमा सहभागी नहुने बताएसँगै नेपाल समूहका नेताहरुले सरकारमा सहभागी हुनुपर्नेमा जोड दिएका छन् ।

बुद्धनगरस्थित सहाना प्रधान स्मृति प्रतिष्ठानको भवनमा बसेको नेपाल समूहको बैठकमा सहभागी अधिकांश नेताहरुले देउवा सरकारमा सहभागी हुनुपर्नेमा जोड दिएका हुन् । 

सरकार सहभागी हुन आफ्नै नेताहरुको दबाब परेको नेपाल समूहले संसदीय दलको नेताबाट केपी शर्मा ओलीलाई हटाउने गरी तयारी गरेको छ ।

पार्टी एकताका लागि वार्ता भइरहेका बेला नेपाल समूहले ओली समूहका सांसदहरुलाई आफूतिर तानेर बहुमत पुर्याउने रणनीति लिएको छ । ओलीलाई संसदीय दलबाट हटाउने तयारी गरिरहेको नेपाल समूहका एक नेताले जानकारी दिए ।