विप्लवले भेटे युद्धका सहयात्री बादलाई

काठमाडौं । नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ र एमालेका नेता रामबहादुर थापा ‘बादल’  बीच आज  भेटवार्ता भएको छ ।

पूर्व माओवादी नेता बादललाई भेट्न विप्लव उनको निवासमा पुगेका थिए । भेटमा विप्लव समूहका नेताहरु खड्गबहादुर विश्वकर्मा र सन्तोष बुढामगर पनि सहभागी थिए । उनीहरुबीच भएको कुराकानीको विषय सार्वजनिक गरिएको छैन । बादल र विप्लव विगतमा सँगै सशस्त्र युद्धमा सहभागी भएका थिए । तत्कालीन नेकपा माओवादीबाट मोहन वैद्य समूह अलग हुँदा बादल र विप्लव दुवैले वैद्यलाई साथ दिएका थिए ।

तर त्यसको एक वर्ष नपुग्दै विप्लवले अर्को पार्टी गठन गरेर गए भने बादल नेकपा माओवादी केन्द्रमा फर्किए । हाल बादलले माओवादी केन्द्र पनि छाडेर नेकपा एमालेमा रहेका छन् ।

बादलले सामाजिक सञ्जालमार्फत विप्लवले आफूसँग संवाद गरेको जानकारी  दिएका छन् । विप्लवले एक सातायता भएको राजनीतिक भेटघाटमा फागुन २० गते केपी ओली नेतृत्वको तत्कालीन सरकारसँग भएको तीन बुँदे सम्झौता कार्यान्वय र आफ्ना नेता कार्यकर्ताको रिहाइलाई प्रमुखताका साथ उठाइरहेका छन् ।