जसपालाई निर्वाचन आयोगकाे आदेश: साउन ११ गते दुबै पक्ष आयोगमा उपस्थित हुनू

काठमाडाैं । जसपाका दुबै पक्षलाई आगामी साउन ११ गते निर्वाचन आयोगले कार्यकारिणी समितिका सदस्यसहित आयोगमा उपस्थित हुन आदेश दिएको छ । 

आयोगले जसपाको विवादका सन्दर्भमा अन्तिम फैसला सुनाउनुअघि एकता बखतको केन्द्रीय कार्यकारिणी समितिका ५१ जनालाई सनाखतका लागि बोलाउने निर्णय गरेकाे हाे ।

पार्टीको आधिकारिकता दाबी सम्बन्धमा दुवै पक्षका कानुन व्यवसायीको बहस सुनिसकेपछि आयोगले आगामी साउन ११ गते दुबै पक्षलाई कार्यकारिणी समितिका सबै सदस्यकाे नागरिकता प्रमाणपत्रसहित आयोगमा उपस्थित हुन सूचित गरेको छ ।

तत्कालीन समाजवादी पार्टी र राजपा नेपालबीच एकीकरणपछि बनेको जसपा नेपालमा ५१ सदस्यीय कार्यकारिणी समिति बनाइएको थियो । तर महन्थ ठाकुरले गत पुस ७ गतेको बैठकले आफूलाई अधिकार दिएको भन्दै कार्यकारिणी समितिमा हेरफेर गरेका थिए ।

आयोगले ठाकुरद्वारा हेरफेर गरिएको कार्यकारिणी समितिलाई भने मान्यता दिएन । आयोगले पार्टी एकतापछि बनेको ५१ सदस्यीय कार्यकारिणी समितिका सदस्यलाई सनाखतका लागि बोलाएको हो ।

५१ सदस्यीय कार्यकारिणी समितिमा उपेन्द्र यादव पक्षले आफ्नो बहुमत रहेको दाबी गर्दै आएको छ । यादव पक्षले कार्यकारिणी समितिमा आफ्ना पक्षका ३१ जना सदस्य रहेको दाबी गरेको छ ।