प्रधानमन्त्री देउवालाई मन्त्रीमण्डलको भागबण्डा मिलाउन सकस

काठमाडौं । प्रधानमन्त्री शेरबहादुर देउवालाई मन्त्रीमण्डलको भागबण्डा मिलाउन हम्मेहम्मे परेको छ ।

गठबन्धनको सरकार भएकाले समर्थन गराएर मन्त्रीमण्डल विस्तार गर्न प्रधानमन्त्री देउवालाई गाह्रो परेकाे हाे ।

माओवादी केन्द्र र जनता समाजवादी पार्टीले रोजेको मन्त्रालय माग्दा शेरबहादुर देउवालाई अहिले गठबन्धनको सरकार नै भारी परेको छ ।

नेपाली कांग्रेस भित्र सन्तुलन मिलाउनु पर्नेछ भने समर्थन जनाएका पार्टीहरुलाई रोजे अनुसार मन्त्रालय दिँदा सरकारको काम द्रुस्त नहोला भन्ने चिन्तामा समेत छन् प्रधानमन्त्री देउवा ।

माओवादी केन्द्रले ६ मन्त्रालय सहित एक उपप्रधानमन्त्रीको माग गरिरहेको छ । अर्थ मन्त्रालय माओवादीलाई दिएका देउवाले थप ठूलो मन्त्रालय नदिने योजना बनाएका छन् तर माओवादी केन्द्रले परराष्ट्र मन्त्रालयको माग गरिरहेको छ । शेरबहादुर देउवा भने परराष्ट्र मन्त्रालय जसरी पनि कांग्रेसले नै पाउनु पर्ने अडानमा रहेका छन् । परराष्ट्र मन्त्रालयमा डा मिनेन्द्र रिजाललाई वा सुजाता कोईरालालाई ल्याउन सक्ने सम्भावना बढ्दो रहेको चर्चा छ ।

जसपाको पनि आफ्नै माग रहेको छ । जसपाका अध्यक्ष उपेन्द्र यादवले प्रधानमन्त्री देउवालाई खुलेरै भनेको छ, “माओवादी केन्द्रले जति वटा मन्त्रालय पाउँछ हामीले पनि त्यत्ति नै पाउनुपर्छ । हाम्रो जसपा फ़ुट्को अवस्थामा हुँदैहुँदै पूर्ण समर्थन गरेका छौं त्यसैले माओवादी केन्द्रको सरह पाउनुपर्छ ।”

जसपाले स्वास्थ्य मन्त्रालय र रक्षा मन्त्रालयको लागि जोड दिइरहेको छ । उपेन्द्र यादवले यी दुई मन्त्रालय संगै उपप्रधानमन्त्रीको माग गरिरहेका छन् । तर शेरबहादुर देउवा भने स्वास्थ्य मन्त्रालय भने कुनै हालतमा पनि अरुलाई नदिने मुडमा छन् । गगन थापा वा डा शशांक कोईरालालाई स्वास्थ्यमन्त्री बनाउने तयारीमा छन् देउवा । 

माओवादी केन्द्र र जसपालाई मिलाउने चटारो त छँदैछ, देउवालाई नेपाली कांग्रेस भित्र पनि शक्ति सन्तुलन मिलाउन जरुरी छ । कृष्ण प्रसाद सिटौला, राम चन्द्र पौडेलबाट एक एक जनालाई मन्त्री बनाउन पार्टी भित्र बाटै दबाब आइरहेको छ ।