देउवालाई विश्वासको मत दिन्छौंः रामकुमारी झाँक्री 

काठमाडौं । प्रधानमन्त्री शेरबहादुर देउवाले आज प्रतिनिधिसभाबाट विश्वासको मत लिने भएका छन् । सर्वोच्च अदालतको परमादेशपछि असार २८ मा प्रधानमन्त्री भएका देउवाले आजै विश्वासको मत लिने निर्णय गरेका हुन् ।

एमालेमा माधव नेपाल पक्षलाई मिलाउन बिघटित कार्यदल सक्रिय भएपछि देउवा प्रतिनिधिसभाको अधिवेशन सुरु भएकै दिन विश्वासको मतदिने पक्षमा पुगेका हुन् । देउवालाई माधव नेपाल पक्षले पनि विश्वासको मतदिने भएको छ ।

माधव नेपाल समूहकी सांसद रामकुमारी झाँक्रीले देउवालाई विश्वासको मत दिने उल्लेख गर्दै सामाजिक संजालमा लेखेकी छन्–हामीले ७६(५) को प्रधानमन्त्रीको लागि संघीय संसदका माननीय सदस्य शेरबहादुर देउवालाई समर्थन गरेका थियौँ । १ सय ४९ जनाको समर्थन हुँदा पनि राष्ट्रपतिबाट नियुक्ति नभएपछि १ सय ४६ जना सदस्यहरू सर्वोच्च अदालतको ढोका ढकढकाउन पुगेका हौँ ।

अदालतले परमादेशको आदेश जारी गरेपछि बनेको सरकार र प्रधानमन्त्रीलाई विश्वासको मत दिनु हाम्रो कर्तव्य हो । सकिन्छ, नेकपा एमालेले संस्थागत निर्णय गरी फ्लोरमा बसेर विश्वासको मतको पक्षमा भोट हालौँ । त्यसो गर्न सकिंदैन भने सांसदहरूलाई संसदको पूरा कार्यकाल संचालन गर्न हामी सबैले विवेक प्रयोग गरी पक्षमा भोट हालौं । यदि त्यो पनि भएन भने हामी २३ जना निवेदककर्ताले भोट हाल्नु त हाम्रो कर्तव्य नै हो । हामीले विश्वासको मतको पक्षमा भोट हाल्नेछौं ।