देउवा सरकारले विश्वासको मत पाओस् भन्ने ओलीको चाहना

 काठमाडाैं ।  प्रधानमन्त्री शेरबहादुर देउवाले आज विश्वासको मत लिने भएका छन् । 

संसद सचिवालय स्रोतका अनुसार आज पहिलाे पटक बस्न लागेकाे प्रतिनिधि सभा बैठकमा प्रधानमन्त्री देउवाले विश्वासको मत लिने तयारी गरेका हुन । 

नेकपा एमालेका बरिष्ठ नेता माधवकुमार नेपाल पक्षले प्रधानमन्त्री देउवालाई विश्वासको मत दिने भएकाे छ ।

आफूहरू पहिलेदेखि नै संसद् पूर्णकाल चल्नुपर्ने पक्षमा उभिएकाले अहिले पनि जे गर्दा संसद् पुरा अवधि चल्न सक्छ सोही गर्ने बताउँदै नेपाल पक्षले विश्वासको मत दिने निर्णय गरेकाे हाे । 

प्रतिनिधि सभामा विश्वासको मत पाउन देउवालाई कुल १ सय ३६ सांसदको समर्थन चाहिने हुन्छ । यतिवेला देउवासँग कांग्रेसका ६१, माओवादी केन्द्रका ४९ सांसद छन् भने जसपाको उपेन्द्र यादव पक्षमा १७ र राष्ट्रिय जनमोर्चाका एक सांसद छन् ।  एमालेको नेपाल समूहका  सांसदले विश्वासको मत दिने भएपछि देउवाको पक्षमा स्पष्ट बहुमत देखिन्छ । 

प्रमुख प्रतिपक्षी दल नेकपा एमालेका अध्यक्ष केपी शर्मा ओली पनि देउवाले विश्वासको मत पाउन् भन्नेमा देखिन्छन् । देउवाले विश्वासको मत नपाए मुलुक निर्वाचनमा जाने र अहिले एमालेको अवस्था कमजोर रहेकाले पनि वर्तमान सरकारले विश्वासको मत पाओस् भन्नेमा ओली देखिएका छन् । 

भलै एमालेको संस्थापन पक्षले विश्वासको मत नदिने भए पनि नेपाल समूहले दिएमा ओलीलाई भित्रि रुपमा आपत्ति नरहेको एक नेताले जानकारी दिए । 

देउवाले विश्वासको मत पाएपछिको डेढ वर्ष मुलुक निर्वाचनमा जाने छैन र यस अवधिमा प्रशस्त चलखेल गर्न समय पुग्ने आंकलनसहित ओलीले देउवा सरकारले विश्वासको मत पाओस् भन्ने इच्छा राखेका हुन् । 

यसबीचमा देउवा सरकारको कमिकमजोरी केलाएर जनतामाझ आलोचित बनाउने पक्षमा ओली रहेका छन् । 

देउवा सरकारले विश्वासको मत पाओस् भन्नकै लागि पनि ओलीले अहिले नेपाल समूहलाई सहमति नल्याएको तर्क पनि सुनिन थालिएको छ । नेपाल समूहलाई चिढियाएर देउवा सरकारलाई विश्वासको मत दिने गरी ओलीले कुटिल चाल चलेको पनि एमालेभित्र कुराकानी हुन थालेको छ ।