सांसद आले भन्छन्–बिरामी भएर घरमै आराम गरिरहेको छु

काठमाडौं । एमालेका सांसद प्रेम आलेले मन्त्री बन्नका लागि प्रधानमन्त्री शेरबहादुर देउवाको निवास बुढानीलकन्ठ गएको समाचारमा सत्यता नभएको बताएका छन् । 

नेपाल फेससँग कुरा गर्दै सांसद आलेले भने–‘म ढाडको समस्याले बिरामी भएर कोटेश्वरस्थित घरमै आराम गरिरहेको छु । केही दिनदेखि घरबाट बाहिर नै म गएको छैन । तर देउवा निवास बुढानीलकन्ठमा गएको भ्रमपूर्ण समाचार प्रकाशित गरी मेरो चरित्रहत्या गरिएकोमा खेद प्रकट गर्दछु ।’

बुढानीलकन्ठमा मन्त्री खान गएको भन्ने कुराको खण्डन गर्दै आलेले २०७८ असार २१ मा ढाडको समस्याका कारण ब्लूक्रस अस्पतालमा परीक्षण गरी चिकित्सकको सल्लाहमा आराम गरिरहेको प्रेस्क्रिप्सन नै सामाजिक संजालमा राखेका छन् ।  आफू एमालेको सांसद भएको र पार्टीको हित बिरुद्ध लाग्ने कुरा सोच्न पनि नसक्ने बताए । आलेले बुढानीलकन्ठ गएको प्रमाण पेश गर्ने चुनौती दिएका छन् ।

मन्त्री बनाइदिन आग्रह गर्न सांसद आले देउवा निवासमा गएको समाचार केही अनलाइनले समाचार प्रकाशित गरेका छन् । आलेले आफूसँग ९ सांसद रहेको र मन्त्री बनाएमा फ्लोरक्रस गरी विश्वासको मत दिने प्रस्ताव गरेको समाचार भाइरल बनाइएको छ ।