राष्ट्रपति भण्डारी देउवालाई सपथ गराउनासाथ हिंडेपछि…

काठमाडौं । राष्ट्रपति विद्यादेवी भण्डारीले नेपाली कांग्रेसका सभापति शेरबहादुर देउवालाई नियुक्ति गर्दा संविधानको धारा ७६(५) अनुसार गरिएको शब्द नै उल्लेख नगरेपछि विवाद निम्तियो । सपथ खुवाउने कार्यक्रम नै साढे २ घन्टा बिलम्ब भयो । देउवाको नियुक्तिपत्रमा संविधानको धारा नै उल्लेख नगरेपछि सपथ नै नखान कानुन ब्यवसायीले सल्लाह दिए ।

मुख्यसचिव शंकरदास बैरागीलाई नवनियुक्त प्रधानमन्त्री देउवाले नियुक्तिपत्रको भाषा नसच्याएसम्म सपथ नखाने अडान लिएपछि कर्मचारीको भाषणमा धारा ७६(५) उल्लेख भए पनि लिखतमा अझै सच्याइएको छैन । नियुक्तिपत्रमा धारा उल्लेख नगरी राष्ट्रपति भण्डारीले जुन विवाद सृजना गरिन्, यसले उनको नियत सफा नदेखिएको पुष्टी भएको छ । नियुक्तिपत्रमा धारा उल्लेख नगरी विवाद उत्पन्न गराउने काम राष्ट्रपति भण्डारीबाट भएकाले सपथमा बिलम्ब भयो । 

सपथ खुवाइसकेपछि राष्ट्रपतिले नवनियुक्त प्रधानमन्त्रीलाई विभिन्न देशका राजदूत र अतिथिहरुसँग परिचय गराउने प्रचलन रहिआएको छ । यसअघि केपी ओलीलाई सपथ खुवाइसकेपछि भण्डारीले परिचय गराएकी थिइन् । तर देउवालाई सपथ खुवाउनासाथ राष्ट्रपति भण्डारी कार्यक्रमबाट हिंडेकी थिइन् । उनले नवनियुक्त प्रधानमन्त्रीलाई सपथ खुवाइसकेपछि देखाएको यस्तो कार्यले पदको गरिमालाई नै घटाउने काम गरेको टिप्पणी कार्यक्रममा सहभागीहरुले गरेका थिए ।

प्रधानमन्त्रीको सपथग्रहण कार्यक्रममा बिशिष्ट अतिथिहरु उपस्थित भएका हुन्छन् । विदेशस्थित कूटनीतिक नियोगका प्रमुखहरु समेत हुन्छन् । राष्ट्रपतिले देउवालाई सपथ खुवाइसकेपछि जसरी हिंडिन् यसले पदीय गरिमाकै खिल्ली उडाइएको अर्थमा लिइइको छ । उनको बडील्याङ्वेजले पनि देउवालाई सपथ खुवाउनुपर्दा असहज महसुस भएको बताउँथ्यो । सपथलगत्तै उनी हिंडेपछि त झन् उनी देउवालाई प्रधानमन्त्री बनाउनुपर्दा खुसी नभएको कुरालाई झन् पुष्टी गरेको छ ।