प्रधानमन्त्री नियुक्तिको भाषा विवाद, सपथ सुरु भएन

काठमाडौं । राष्ट्रपति विद्यादेवी भण्डारीले सर्वोच्च अदालतको परमादेशलाई पालना गर्दा पनि कपटपूर्ण काम गरेकी छन् । राष्ट्रपति कार्यालयले जारी गरेको प्रधानमन्त्रीको नियुक्तिपत्रमा संविधानको धारा समेत उल्लेख नगरेको बिषयमा विवाद भएपछि सपथ नै नलिने अडान शेरबहादुर देउवाले लिएका छन् ।

देउवालाई प्रधानमन्त्री नियुक्ति गरिएको पत्र सार्वजनिक भएपछि कानुनविदहरुले धारा उल्लेख नगरेकाले राष्ट्रपति कार्यालयले नसच्याएसम्म सपथ नलिन सल्लाह दिएपछि साँझ ६ बजे नै हुनुपर्ने कार्यक्रम सुरु नै हुनसकेको छैन ।

सपथका लागि नेपाली काँग्रेसका सभापति शेरबहादुर देउवा राष्ट्रपति भवन शितल निवासमा पुगेका छन् । शितल निवासमा पुगेर उनले शपथ विवादबारे छलफल गरिरहेका छन् । तर राष्ट्रपति कार्यालयले नियुक्तिको भाषा अझैसम्म सच्याएको छैन । 

नवनियुक्त प्रधानमन्त्रीको सपथ कार्यक्रममा साँझ ६ बजेदेखि नै शीर्षनेताहरु उपस्थित छन् । तर राष्ट्रपति कार्यालयले नियुक्तिको भाषा सच्याएर कार्यक्रम सुरु गरेको छैन ।  सपथ ग्रहण कार्यक्रममा ६ बजेदेखि आएका बिशिष्ट ब्यक्तिहरु पर्खिएको पर्खियै छन् ।