ओलीलाई एमालेको अध्यक्ष पदबाट राजीनामा दिन डा. पौडेलको सुझाव

काठमाडौं । सर्वोच्च अदालतले नेपाली कांग्रेसका सभापति शेरबहादुर देउवालाई २८ घन्टाभित्र प्रधानमन्त्री नियुक्त गर्न परमादेश दिएपछि राजनीतिक क्षेत्र तरंगित भएको छ । सर्वोच्चले प्रतिनिधिसभा पुनस्र्थापना गर्ने आदेश दिने आँकलन गरिए पनि देउवालाई प्रधानमन्त्री बनाउन परमादेश दिने अनुमान कसैले पनि गरेका थिएनन् । सर्वोच्चले परमाादेश दिएपछि प्रधानमन्त्री केपी शर्मा ओलीका अगाडि तत्काल पदबाट राजीनामा दिन दबाब परेको छ ।

उनलाई प्रधानमन्त्री मात्र होइन, एमालेको अध्यक्षबाटै राजीनामा दिनुपर्ने आवाजहरु पनि पार्टीभित्रैबाट उठेका छन् । एमालेका नेता डा.बिजय पौडेलले ओलीलाई एमालेको अध्यक्षबाट राजीनामा दिन सुझाव दिएका छन् ।  

पौडेलले लेखेका छन्–‘आदरणीय अध्यक्ष केपी शर्मा ओलीज्यू, आफ्ना प्रतिगामी कदमबारे खुलाखुलस्त आत्मालोचना गर्दै अध्यक्ष पदबाट राजीनामा दिएर पार्टी एकतालाई सुदृढ बनाउनुहोस् । यतिका धेरै अपराध गरिसकेपछि अध्यक्षको पदमा बस्न मिल्दैन । आफ्नो वरिपरि भएका ती गलत तत्वहरुको कुरा नसुन्नुहोस् । तपाईका वास्तविक हितैषी हामी इमान्दार कार्यकर्ता हौं, हामी तपाईंको इज्जत प्रतिष्ठा पुनस्र्थापित भएको हेर्न चाहन्छौं ।’