अदालतको निर्णय प्रभावित हुनेगरी हस्ताक्षर फिर्ता हुँदैन, निराश नबनाैँ- रामकुमारी झाँक्री

काठमाडाैँ । नेकपा एमालेको माधवकुमार नेपाल समूहकी नेतृ रामकुमारी झाक्रीले संसद विघटन बदर र कांग्रेस सभापति शेरबहादुर देउवालाई प्रधानमन्त्रीमा समर्थन गर्दै बुझाइएको हस्ताक्षर फिर्ता नलिइने बताएकी छन् ।

उनले अदालतको निर्णय प्रभावित हुने गरि हस्ताक्षर फिर्ता लिने कुरै नआउने बताएकी हुन् । 

सामाजिक सञ्जालमार्फत उनले भनेकी छन्, ‘अदालतमा निवेदकको रूपमा रहेका हामी सांसदहरूले अदालतको निर्णय प्रभावित हुने गरि हस्ताक्षर फिर्ता लिइने छैन । लिने कुरै आउँदैन ।’

झाक्रीले एमाले विवाद समाधानका लागि गठित कार्यदलले सार्वजनिक गरेको सहमतिको प्रस्तावको भ्रममा नपर्न आग्रह गरेकी छन् ।

उनले यो प्रस्तावलाई स्वागत गर्न हतार गर्न नहुने र निराश पनि बन्न नहुने बताएकी छन् । 

‘भ्रममा नपरौँ, स्वागत गर्न हतार नगरौँ । निराश पनि नबनौँ । राजनीति हो यसले बाटो लिन्छ । उज्यालो पहिल्याउन सकिन्छ’, झाक्रीको भनाइ छ ।

उनले १० बुँदे सम्झौताबारे आफ्नो समूहको केन्द्रीय कमिटि बैठक बसेर संस्थागत धारणा आउने पनि जानकारी दिएकी छिन् ।