एमाले कार्यदलमा सहमति, स्थायी कमिटीको बैठक बस्ने तयारी

काठमाडौँ । नेकपा एमालेको विवाद समाधान कार्यदलमा सहमति जुटेको छ । 

आइतबार साँझ सकिएको कार्यदलको बैठकमा विवादित विषयमा सहमति भएको एमालेका सचिव एवं कार्यदलका सदस्य गोकर्णराज विष्टले जानकारी दिए । 

सहमतिपश्चात् स्थायी कमिटीबाट अनुमोदान गराउने तयारी गरेर दिउँसो ४ बजेका लागि राखिएको स्थायी कमिटीको बैठक आजसम्मका लागि सारिएको थियो भने पार्टीको केन्द्रीय कमिटीको बैठक भोली बिहान ११ बजेका लागि डाकिएको एमालेका केन्द्रीय कार्यालय सचिव शेरबहादुर तामाङले जानकारी दिए । सचिव तामाङका अनुसार स्थायी कमिटीको बैठक केही समयपछि बस्ने कार्यक्रम रहेको छ। 

एमालेका अध्यक्ष केपी शर्मा ओली र वरिष्ठ नेता माधवकुमार नेपालबीच गत जेठ २ गतेको सहमतिका आधारमा गठित १० सदस्यीय कार्यदलले कार्य गरिरहेका बेला गत जेठ ८ गते दोस्रो पटक प्रतिनिधिसभाको विघटन भएपछि एमालेमा विवाद बल्झिएको थियो ।