कार्यदलको बैठक सकियो, सहमति हुने दिन फेरि भोलिका लागि सारियो

काठमाडौँ । शनिबार सहमति हुने भनिएको नेकपा एमालेको विवाद समाधान कार्यदलको फेरि पनि सहमति नगरी टुंगिएको छ । शुक्रबार जस्तै आज पनि संचारकर्मीहरुसँग कार्यदलका सदस्य गोकर्ण बिष्टले भोलि सुखद् समाचार सुन्न पाउने बताएका छन् ।

 बैठकपछि विष्टले सबै विषयमा छलफल भएर सहमति भएको जानकारी दिए, तर के सहमति भयो त्यो भने अहिलेसम्म पनि अज्ञात छ । 
बिष्टले समग्रतामै समस्या समाधान खोजेको बताएका छन् । आम पार्टी पंक्तिले अपेक्षा गरेको र एमालेलाई माया गर्ने जनताले चाहेको सुखद् समाचार भोलि नै दिने उनले बताए ।

सोमबारदेखि सबैले कार्यदलका सदस्यहरुको भाका यही किसिमको सुन्दैआएका छन् । शुक्रबार त माधव नेपाल पक्षका कार्यदल सदस्य घनश्याम भूसालले वार्ता सुरुमा जुन ठाउँमा थियो, त्यहाँभन्दा एक इन्च पनि प्रगति हुन नसकेको बताएपछि ‘सहमति’को वास्तविकता छर्लङ्ग भएको थियो ।