माधव नेपाल पक्षका सांसदहरुको बैठक सम्पन्न, केन्द्रीय सदस्यहरुको बैठक बस्दै

काठमाडौं । नेकपा (एमाले) को विवाद समाधान हुने दिशातिर उन्मुख रहेकै अवस्थामा माधव नेपाल पक्षका सांसदहरुको बैठक सम्पन्न भएको छ । सांसदहरुको बैठकले प्रधानमन्त्री तथा पार्टी अध्यक्ष केपी शर्मा ओलीले अदालतको फैसला आउनुभन्दा अघि सहमतिको नाटक गरेको र अदालतको फैसलालाई प्रभावित पारेपछि आफूहरुलाई वास्तै नगर्ने  निश्कर्ष निकालेको एक सांसदले बताएका छन् ।

विवाद समाधानको लागि गठित कार्यदलको लगातार बसेको बैठकले सहमतिको खाका तयार पारेको र शनिबार संयुक्त विज्ञप्तिमा हस्ताक्षर गर्ने भनिएको छ । यद्यपि प्रधानमन्त्री केपी शर्मा ओलीले शेरबहादुर देउवालाई प्रधानमन्त्री बनाउनको लागि गरिएको हस्ताक्षर फिर्ता हुनुपर्ने अडान छाडेका छैनन् । माधव नेपाल पक्ष कुनै हालतमा हस्ताक्षर फिर्ता नहुने अडानमा छ । तर हस्ताक्षरका बारेमा बीचको बाटो अपनाएर भए पनि पार्टी एकताका लागि कार्यदलका सदस्यहरु छलफलमा छन् ।

बुधबार अध्यक्ष केपी शर्मा ओली र वरिष्ठ नेता नेपालबीच होटल म्यारियटमा भएको भेट सकारात्मक भएको र सोही भेटवार्ताको आधारमा कार्यदलले सहमतिको लागि मस्यौदा तयार पारेको छ । तर, नेपाल पक्षधर सांसदहरु भने कुनै पनि हालतमा देउवालाई गरेको समर्थन फिर्ता नलिने पक्षमा छन् ।

सांसदहरुको बैठक सकिएपछि माधव नेपाल पक्ष केन्द्रीय कमिटी बैठकमा जुटेको छ ।