एमाले कार्यदलकाे बैठक चलिरहँदा प्रचण्ड नेपाललाई भेट्न काेटेश्वरमा

काठमाडौं । एमालेको एकताका लागि कार्यदलको बैठक सिंहदरबार चलिरहँदा माओवादी केन्द्रका अध्यक्ष पुष्पकमल दाहाल प्रचण्ड एमाले नेता माधवकुमार नेपाललाई भेट्न कोटेश्वर पुगेका छन् । 

एमाले एकता हुन नदिएको आरोप खेपिरहेका प्रचण्ड मंगलबार अपरान्ह माधवकुमारलाई भेट्न उनकै निवास कोटेश्वरमा पुगेका हुन् । एमालेको एकताले गति लिँदै कार्यदल ब्यूँताएर छलफल अगाडि बढाइएको भोलिपल्टै प्रचण्ड नेता नेपाललाई भेट्न पुगेका हुन् । 

प्रतिनिधि सभा विघटन र संविधानको धारा ७६ (५)अनुसार सरकार गठन सन्दर्भमा परेका रिटमाथिको बहस सकिएकै दिन सोमबार एमालेका संस्थापन ओली समूह र असन्तुष्ट माधवकुमार नेपाल समूह यसअघि गठित कार्यदल ब्यूँताएर एकता प्रक्रिया अगाडि बढाउन राजी भएका हुन् । 

उक्त रिटको फैसला आउनुअघि नै एमाले एकताका लागि पुन प्रयास थालिएको छ । जस अनुसार मंगलबार अपरान्ह सिंहदरबारमा कार्यदलको बैठक बसेको छ ।