जसपाको विवाद मिलेन, अन्तत: पार्टी फुट्ने नै भयाे

काठमाडौं । जनता समाजवादी पार्टी (जसपा) फुट्ने भएको छ । पार्टी भित्र विवाद बढ्दै गएपछि जसपाका दुई अध्यक्ष महन्थ ठाकुर र उपेन्द्र यादव पार्टी फुटाउने निर्णयमा पुगेका हुन् ।

मंगलबार पार्टीको विवाद समाधान गर्न छलफलको लागि निवार्चन आयोगले ठाकुर पक्ष र यादव पक्षलाई बोलाएको थियो । तर दुवै पक्ष पार्टीलाई कानुनी रुपमा फुटाउने सहमति गरेर निर्वाचन आयोगबाट बाहिरिएका छन्। 

आयोगमा भएको छलफलमा दुवै पक्षले एकै पार्टीमा रहन नसकिने निष्कर्ष निकाले । दुवै पक्षका नेताहरु अब अलग रहनु ठिक हुने भन्दै फुटाउने सहमति गरेर आयोगबाट बाहिरिएका हुन् । 

दुवै पक्षले आधिकारिकता दाबी नछाडेपछि आयोगले दल दर्तासम्बन्धी ऐनअनुसार आउन निर्देशन दिएको जनाइएको छ । आज आयोगमा ठाकुरपक्षका लक्ष्मणलाल कर्ण, सुरेन्द्र झा, केशव झा र दुईजना कानुन व्यवसायी पुगेका थिए भने यादवपक्षका उनीसहित डा. बाबुराम भट्टराई, राजेन्द्र श्रेष्ठ, महेन्द्र राय यादव र प्रकाश अधिकारी पुगेका थिए ।