प्रचण्डको भविष्यवाणी- सर्वोच्चले संसद पुनर्स्थापना गर्छ

काठमाडौं । नेकपा माओवादी केन्द्रका अध्यक्ष पुष्पकमल दहाल प्रचण्डले सर्वोच्च अदालतले संसद पुनर्स्थापना गर्ने छ भन्दै भविष्यवाणी गरेका छन् ।

पार्टीका केन्द्रीय सदस्य महादेव यादवको निधनप्रति शोक व्यक्त गर्न मंगलबार जनकपुर पुगेका प्रचण्डले शेरबहादुर देउवालाई प्रधानमन्त्रीमा नियुक्त गर्न सर्वोच्च अदालतले परमादेश जारी गर्ने भविष्यवाणी गरेका हुन् । 

प्रतिनिधि सभा पुनर्स्थापित हुने दाबी गर्दै प्रचण्डले भने,‘संसद पुनर्स्थापना मात्रै गर्दैन, सर्वोच्च अदालतमा बुझाएको १ सय ४६ संसदको हस्ताक्षरको आधारमा नेपाली कांग्रेसका सभापति शेरबहादुर देउवालाई प्रधानमन्त्री बनाउन परमादेश समेत जारी गर्ने हामीलाई विश्वास छ ।’

संविधानको मर्म र भावना अनुसार, लोकतान्त्रिक मूल्य मान्यता अनुसार संसद पुनर्स्थापनाको कुनै विकल्प नरहेको उनको भनाई थियो । ‘संसद पुनर्स्थापना हुँदैन भन्नुको अर्थ संविधान तथा लोकतन्त्र मिचे पनि हुन्छ भन्ने नजिर स्थापित हुन्छ त्यतातर्फ म कल्पनासम्म गर्न सक्दिनँ,’ उनले भने।

प्रतिनिधि सभा विघटनविरुद्ध र संविधानको धारा ७६(५)अनुसार सरकार गठन सन्दर्भमा परेका रिटमाथि संवैधानिक इजलासमा सुनुवाइ सकिएको छ । र यही असार २८ गतेसम्मलाई हेर्दाहेर्दैमा राखिएको छ । उक्त रिटको फैसला आउनु अघि प्रचण्डको सो भविष्यवाणी आएको हो ।