एमाले कार्यदलको बैठक आज पनि, विवाद समाधान हुने आशा

काठमाडौँ । नेपाल कम्युनिष्ट पार्टी (नेकपा) एमालेको विवाद समाधान गर्न गठित १० सदस्यीय कार्यदलको बैठक आज पनि बस्दैछ । 

आज दिउँसो १ बजेपछि बस्ने बैठकमा पार्टीभित्रको विवाद समाधानका लागि दुबै पक्षबीच गम्भीर छलफल हुने नेताले बताएका छन् । 

यसअघि सोमबारको बैठकमा अहिलेसम्म भएका अनौपचारिक छलफलबारे  पुनरावलोकन भएको थियो  । साथै,कार्यदलका सदस्यहरूबीच विवाद समाधानका लागि नयाँ शिराबाट अघि बढ्ने सहमति पनि भएको बताइएको छ। 

प्रतिनिधिसभा विघटनविरुद्ध सर्वोच्चमा परेको रिट निवेदनमाथिको बहस सोमबारै सकिएकाले पनि यो मुद्दामा नेताहरू अव प्रवेश गर्न नचाहेको बताइएको छ । योसँगै सर्वोच्चको फैसला जे आउँछ त्यो मान्न दुवै पक्ष तयार भएको बुझिएको छ । यसले नेकपा एमाले विवाद समाधानको दिशामा अघि बढ्ने एमाले नेता कार्यकर्तामा आशा बढेको छ । 

कार्यदलमा अध्यक्ष ओली पक्षका संयोजक सुवास नेम्वाङ छन् भने माधव नेपाल पक्षका संयोजक भीम रावल छन् । सदस्यहरूमा ओली पक्षका विष्णु पौडेल, शङ्कर पोखरेल, विष्णु रिमाल र प्रदीप ज्ञवाली छन् भने नेपाल पक्षबाट घनश्याम भुसाल, गोकर्ण विष्ट, सुरेन्द्र पाण्डे र रघुजी पन्त रहेका छन् ।