काठमाडौं । कुटपिट गरेको आरोपमा पक्राउ परेकी आफूलाई अभियन्ता बताउने ज्वाला संग्रौलामाथि तीन कसुरमा अनुसन्धान थालिएको छ ।
प्रहरी हिरासतमा रहेका बेला खुश्बु घिमिरेमाथि कुटपिट गरेको आरोपमा पक्राउ परेकी ज्वालामाथि अनुसन्धान गर्दा वैवाहिक कागजातसमेत कीर्ते फेला परेको प्रहरीले जनाएको छ ।
हाल अदालतबाट म्याद थप्दै प्रहरीको न्यायिक हिरासतमा राखिएको ज्वाला र उनका पति भनिएका हिमाल उपाध्यायबीचको वैवाहिक सम्बन्धका कागजात कीर्ते फेला परेपछि उनी फन्दामा परेकी हुन् । सरकारी कागजात नै कीर्ते फेला परेपछि ज्वालाको केसले नयाँ रुप लिएको छ ।
संग्रौलाको जन्मदर्ता र उनका पति उपाध्यायबाट नाता प्रमाणित र सम्बन्ध विच्छेदको कागजातलाई प्रमाणीकरण गर्न सम्बन्धित गाउँपालिकालाई पत्र लेख्दा कीर्ते भेटिएको हो ।
कुटपिट र अभद्र व्यवहार गरेको आरोपमा पक्राउ परेकी उनीमाथि थप जातीय भेदभाव र सरकारी लिखत कीर्ते सम्बन्धी कसुरमाथि अनुसन्धान भइरहेको हो ।
