निधिलाई पौडेलकाे सुझाव: उम्मेदवारी खडा गरेर दगुर्नुभन्दा महाधिवेशनको पृष्ठभूमि तयार गर्न लाग्नुस्

काठमाडाैं । नेपाली कांग्रेसका वरिष्ठ नेता रामचन्द्र पौडेलले उपसभापति विमलेन्द्र निधिलाई उम्मेदवारी खडा गरेर दगुर्नुभन्दा पनि पहिले महाधिवेशनको पृष्ठभूमि तयार गर्न तिर लाग्न आग्रह गरेका छन् ।

बुधबार विहान बोहोराटारमा भएकाे भेटवार्तामा पौडेलले पहिले महाधिवेशन गराउन आफ्नो तर्फको जिम्मेवारी पनि पूरा गर्नुस् । अनि सभापतिमा कसले कसलाई सहयोग गर्ने कुरा त्यसपछि गरौंला भन्दै निधिलाई सुझाव दिएका थिए ।

सभापतिको उम्मेदवारीभन्दा समायोजनको विवाद टुंग्याउने र क्रियाशील सदस्यताको मापदण्ड तत्काल पारित गर्ने कुरामा जोड दिनुपर्नेमा निधिसँग पौडेलको जोड थियो । 

निधिले समायोजनको विवाद सकिएको र क्रियाशील सदस्यता विवाद मिलाउन पनि लागि परेको पौडेललाई बताएका थिए ।

लामो समय देउवासँग सहकार्य गरेका निधिले यतिबेला देउवा इतरसँग बढाएको सम्बन्धलाई पौडेलले निको मानेका छैन ।

पौडेलले शशांक र प्रकाशमानसँग विमलेन्द्रले गरेको लन्च मिटिङलाई अभिनयको संज्ञा दिएका थिए । 

असार ७ गते यता निधिले महामन्त्री शशांक कोइराला र पूर्वमहामन्त्री प्रकाशमान सिंहबीच निरन्तर छलफल गरिरहेका छन् ।

निधि नेतृत्वको समायोजनका कामहरू र क्रियाशील सदस्यतामा देखिएका विवादबारे हल गर्न सहयोगी भूमिका खेल्न निधिलाई पौडेलको आग्रह थियो ।