सर्वाेच्चकाे फैसलाले मुलुकमा राजनीतिक द्वन्द्व बढ्याे: महन्थ ठाकुर

काठमाडौं । जनता समाजवादी पार्टीका अध्यक्ष महन्थ ठाकुरले पछिल्लो पटक प्रधानमन्त्री केपी शर्मा ओलीले गरेको मन्त्रिपरिषद पुनर्गठनलाई मान्यता नदिने सर्वोच्च अदालतको फैसालाले मुकुकमा राजनीतिक द्वन्द्व बढ्ने प्रतिक्रिया दिएका छन् ।

ठाकुरले आफूहरु स्वतन्त्र न्यायलयमाथि विश्वास गर्ने भएकोले अदालतको फैसलालाई स्वीकार गर्ने बताउदै अदालतको फैसलाले मुलुकमा राजनीतिक द्वन्द्व बढ्ने टिप्पणी गरेका छन् । 

अदालतको फैसलाले मुलुकमा जुन राजनीतिक समस्या देखिन्छ ती विषयलाई अदालतले विचार पुर्याउनुपर्ने ठाकुरले बताएका छन् ।

मंगलबार प्रधानन्यायाधीश चोलेन्द्र शमशेर राणा र न्यायाधीश प्रकाश ढुंगानाको इजलासले प्रधानमन्त्री केपी शर्मा ओलीले गरेको मन्त्रिपरिषद विस्तारको निर्णय तत्काल कार्यान्वयन नगर्न अन्तरिम आदेश दिएसँगै २० जना मन्त्री पदमुक्त भएका छन् ।

वरिष्ठ अधिवक्ता दिनेश त्रिपाठीले मन्त्रिपरिषद विस्तारविरुद्ध रिट दायर गरेका थिए । त्रिपाठीले प्रतिनिधिसभा विघटन र निर्वाचन घोषणा भएको अवस्थामा मन्त्रिपरिषद विस्तार गर्नु असंवैधानिक भएको दावी गर्दै खारेजीको माग गरेका थिए ।

पहिले माओवादी छाडेर एमालेमा आएका मन्त्रीहरुलाई शपथ ग्रहण गराएका प्रधानमन्त्रीले पछि जसपाबाट समेत मन्त्री नियुक्त गरेका थिए । जसपा सरकारमा आएपछि जेठ १७ मा ३ उपप्रधानमन्त्रीसहित १२ मन्त्री र २ राज्यमन्त्री गरी १४ जना र जेठ २७ गते गृहमन्त्री खगराज अधिकारीसहित ७ मन्त्रीले शपथ लिएका थिए  ।