नेपाली काँग्रेसका शीर्ष नेता आन्तरिक छलफलमा

काठमाडौं । नेपाली काँग्रेसका बरिष्ट नेताहरुबीच  १४ औं महाधिवेशन  कसरी सम्पन्न गर्ने भन्नेमा बिषयमा आन्तरिक छलफल चलिरहेको छ । केन्द्रीय कार्यसमिति बैठक बस्नुअघि पदाधिकारीसहित शीर्ष नेताबीच छलफल जारी छ ।

शीर्ष नेताहरु आन्तरिक छलफलमा व्यस्त भएपछि आज  दिउँसो १ बजेका लागि बोलाइएको बैठक अझै सुरु हुन सकेको छैन । कोरोना महामारीको प्रतिकूलताका बीच पार्टीको चौधौं महाधिवेशन भदौ १६–१९ मा कसरी सम्पन्न गर्ने भन्नेमा काँग्रेसमा बहस जारी छ ।

हिजो (बिहीबार)को बैठकमा महाधिवेशनको एजेन्डा प्रवेश गराउँदै सभापति शेरबहादुर देउवाले जसरी पनि  भदौभित्र महाधिवेशन गरिने बताएका थिए । त्यसका लागि आवश्यक सुझाव राख्न नेताहरूलाई भनेका थिए । आजै बैठक सम्पन्न गरिने भन्दै शीर्ष नेताको तहमा अहिले छलफल भइरहेको केन्द्रीय सदस्य मीन विश्वकर्माले बताए ।