पार्टीको आधिकारिकता दावी गर्न यादव पक्ष निर्वाचन आयोग जाने

काठमाडाैं । दुई अध्यक्षबीच आधिकारिकता विवादमा परेको जनता समाजवादी पार्टी नेपाल (जसपा) का अध्यक्ष उपेन्द्र यादव र बाबुराम भट्टराई पक्षले निर्वाचन आयोगमा उपस्थित हुने निर्णय गरेको छ ।

५१ सदस्सीय कार्यकारिणी समितिका ३० सदस्य उपस्थित यादव पक्षको आज बैठकले आधिकारिकता दावी गर्न आयोगमा उपस्थित हुने निर्णय कार्यकारिणी समितिका सदस्य इस्तियाक राईले जानकारी दिए ।

‘बैठकले आधिकारिकता दावी गर्न नागरिकतासहित बहुमत सदस्यहरु निर्वाचन आयोगमा उपस्थित हुने निर्णय गरेको छ,’ राईले भने ।

अर्का अध्यक्ष महन्थ ठाकुर पक्षले पनि आधिकारिकता दावी गरेको छ । दुवै अध्यक्षले एक अर्कालाई कारबाही गरेका छन् । दुवैले कारबाही गरेको सूचना अद्यावधिक गर्न निवार्चन आयोगले अस्वीकार गरिसकेको छ ।