कांग्रेसले महाधिवेशन गर्न हुने, सरकारले चुनाव गर्न चाहिं नहुने ?

काठमाडाैं । प्रधानमन्त्री केपी शर्मा ओलीले प्रमुख प्रतिपक्ष दल नेपाली कांग्रेसले महाधिवेशन गर्न हुने तर प्रतिनिधिसभा निर्वाचन गर्न किन नहुने भन्ने तर्क राख्दै चुनाव हुन नसक्ने विपक्षी गठबन्धनको दाबी आधारहीन रहेको बताएका छन् ।

प्रतिनिधिसभा विघटनसम्बन्धी मुद्दामा सर्वोच्च अदालतको कारण देखाउ आदेशको जवाफ दिँदै ओलीले कोरोनाको व्यवस्थापन गरी चुनाव गरिछाड्ने दाबी गर्दै चुनाव हुन नसक्ने विपक्षी गठबन्धनको कुरा आधारहीन रहेको बताएका हुन् ।

 ‘रिट निवेदक श्री शेरबहादुर देउवाले यही भदौ महिनामा आफ्नो पार्टी नेपाली काङ्ग्रेसको महाधिवेशन गर्ने गरी कार्यतालिका प्रकाशित गरिसक्नु भएको छ । देशभरका नेता कार्यकर्ता सहभागी हुने महाधिवेशन हुनसक्ने तर चरणबद्ध रुपमा स्वास्थ्य सुरक्षाका मापदण्ड अपनाएर निर्वाचन हुन नसक्ने दावी हचुवा र आधारहीन छ,’ ओलीले लेखेका छन् ।

राष्ट्रिय सभाको निर्वाचन कोरोना संक्रमणको बीचमा नै सम्पन्न गराइएकोले प्रतिनिधिसभा निर्वाचन पनि सम्पन्न गराइने जवाफ ओलीले दिएका छन् ।

ओलीको जवाफमा भनिएको छ, ‘सरकारले संक्रमणलाई नियन्त्रणबाहिर जान नदिन, खोपको व्यवस्था गर्न सबै किसिमका प्रक्रिया र कारबाही अघि बढाइसकेको छ । सबै नागरिकलाई खोप लगाउने प्रतिबद्धता गरी आवश्यक खोप खरिद प्रक्रिया सुरु भइसकेको छ ।’

प्रतिनिधिसभा पुनःस्थापना भए पनि केही निर्वाचन क्षेत्रमा उपनिर्वाचन गर्नुपर्ने पनि ओलीको जवाफ छ । ‘नेकपा (माओवादी केन्द्र) ले आफ्ना प्रतिनिधिसभा सदस्यलाई निष्कासन गरेको छ‚ ती स्थानहरूमा उपनिर्वाचन गर्नैपर्ने हुन्छ । आगामी फागुन महिनामा स्थानीय तहको निर्वाचन गर्नैपर्ने हुन्छ,’ उनको जवाफमा लेखिएको छ ।