विप्लवनिकट १२ संगठनद्वारा सडक निर्माण कार्य रोक्न भारतीय राजदूतलाई चेतावनी पत्र

काठमाडौं । नेत्रविक्रम चन्द विप्लव नेतृत्वको नेकपानिकट विभिन्न १२ वटा  जनवर्गीय संगठनले नेपाली भूमिमा सडक निर्माण कार्य रोक्न चेतावनी दिदै भारतीय राजदूतलाई पत्र लेखेका छन् ।

उनीहरुले त्रिदेशीय बिन्दुभन्दा वर नेपाली भूूभाग  लिपुलेक, कालापानी र लिम्पियाधुरा हुँदै मानसरोवर पुग्ने सडक निर्माण रोक्न माग गर्दै नेपालका लागि भारतीय राजदूत विनय मोहन क्वात्रालाई इमेलमार्फत पत्र पठाएका हुन् । 

मंगलबार उनीहरुले संयुक्त रुपमा पठाएको पत्रमा उक्त निर्माण कार्य तत्काल रोक्न चेतावनी दिदै भारतले सडक निर्माण गरिरहेकोप्रति आफूहरूको गम्भीर ध्यानाकर्षण जनाएका छन् ।

उनीहरुले कूटनीतिक रूपमा आपसी समझदारीमार्फत दुई देशबीचको सीमा समस्या समाधान गर्न सकिने बताउदै नेपालको राष्ट्रिय सार्वभौमिकताको सम्मान गर्नुपर्ने माग पनि पत्रमा गरिएको छ।